நான்காம் திருமுறை-66

4.066.திருநாகேச்சரம் 

திருநேரிசை 

திருச்சிற்றம்பலம் 

இத்தலம் சோழநாட்டிலுள்ளது. 

சுவாமிபெயர் - சண்பகாரண்ணியேசுவரர். 

தேவியார் - குன்றமுலைநாயகியம்மை. 

639 கச்சைசேர ரரவர் போலுங்

கறையணி மிடறர்போலும்

பிச்சைகொண் டுண்பர்போலும்

பேரரு ளாளர்போலும்

இச்சையான் மலர்கள் தூவி

யிரவொடுபகலுந் தம்மை

நச்சுவார்க் கினியர்போலும்

நாகவீச்சரவ னாரே.

4.066.1

  திருநாகேச்சுரத்துப் பெருமான், பாம்புக் கச்சை உடையவராய், நீலகண்டராய், பிச்சை எடுத்து உண்பவராய், பேரருளாளராய், விருப்போடு பூக்களைத் தூவி இரவும் பகலும் தம்மை விரும்பி வழிபடுபவர்களுக்கு இனியராய் உள்ளார்.

640 வேடுறு வேட ராகி

விசயனோ டெய்தார்போலும்

காடுறு பதியர் போலுங்

கடிபுனற் கங்கைநங்கை

சேடெறி சடையர் போலுந்

தீவினை தீர்க்கவல்ல

நாடறி புகழர் போலும்

நாகவீச்சரவ னாரே.

4.066.2

  திருநாகேச்சுரத்துப் பெருமான் வேடன் உருவில் வந்து அருச்சுனனோடு அம்பு எய்து பொருதவராய், சுடுகாட்டை இருப்பிடமாகக் கொண்டவராய், நறுமணம் கமழும் கங்கையாகிய நங்கையை, பெருமையை வெளிப்படுத்தும் சடையில் அடக்கியவராய், தீவினையைத் தீர்க்க வல்லவராய், அதனால் உலகறிந்த புகழை உடையவராய் உள்ளார்.

641 கற்றுணை வில்ல தாகக்

கடியரண் செற்றார்போலும்

பொற்றுணைப் பாதர் போலும்

புலியதளுடையர் போலும்

சொற்றுணை மாலை கொண்டு

தொழுதெழுவார்கட் கெல்லாம்

நற்றுணை யாவர் போலும்

நாகவீச்சரவ னாரே.

4.066.3

  திருநாகேச்சுரத்துப் பெருமான் மலையையே தமக்குத் துணையான வில்லாகக் கொண்டு காவல் அமைந்த முப்புரங்களை அம்பு எய்து அழித்தவராய், பொன்னுக்கு ஒப்பான திருவடிகளை உடையவராய், புலித்தோல் ஆடையராய், வேதத்துக்குச் சமமான பாமாலைகளைக் கொண்டு தொழுது வழிபடுபவர்க்கெல்லாம் மேம்பட்ட துணைவராவார்.

642 கொம்பனாள் பாகர் போலுங்

கொடியுடைவிடையர் போலும்

செம்பொனா ருருவர் போலுந்

திகழ்திருநீற்றர் போலும்

எம்பிரா னெம்மை யாளு

மிறைவனே யென்றுதம்மை

நம்புவார்க் கன்பர்போலும்

நாகவீச்சரவ னாரே.

4.066.4

  பார்வதி பாகராய். காளை எழுதிய கொடியினராய், செம்பொன் போன்ற நிறத்தினராய், விளங்கும் திருநீற்றினராய், எம் பெருமானே! எம்மை அடிமை கொள்ளும் இறைவனே! என்று தம்மை விரும்பும் அடியார்களுக்கு அன்பராய் உள்ளார்.

643 கடகரி யுரியர் போலுங்

கனன்மழு வாளர் போலும்

படவர வரையர் போலும்

பாரிடம் பலவுங்கூடிக்

குடமுடை முழவ மார்ப்பக்

கூளிகள் பாட நாளும்

நடநவி லடிகள் போலும்

நாகவீச் சரவ னாரே.

4.066.5

  யானைத்தோலைப் போர்த்தவராய், கனல் வீசும் மழுப்படையை ஏந்தியவராய், படம் எடுக்கும் பாம்பினை இடையில் கட்டியவராய், பூதங்கள் பலவும் கூடிக் குடமுழாவை ஒலிப்பப் பேய்கள் பாட நாடோறும் கூத்து நிகழ்த்தும் தலைவராய் உள்ளார் திருநாகேச்சுரப் பெருமான்.

644 பிறையுறு சடையர் போலும்

பெண்ணொருபாகர் போலும்

மறையுறு மொழியர் போலும்

நான்மறையவன்ற னோடும்

முறைமுறை யமரர் கூடி

முடிகளால்வணங்க நின்ற

நறவமர் கழலர் போலும்

நாகவீச்சரவ னாரே.

4.066.6

  திருநாகேச்சுரப் பெருமான் பிறைதங்கும் சடையினராய்ப் பார்வதிபாகராய், வேதங்களை ஓதுபவராய், திருமாலோடும் பிரமனோடும் தேவர்கள் முறையாகக்கூடித் தம் தலைகளால் வணங்கும் தேனைப்போல விரும்பத்தக்க திருவடிகளை உடையவராய் உள்ளார்.

645 வஞ்சகர்க் கரியர் போலும்

மருவினோர்க்கௌயர் போலும்

குஞ்சரத் துரியர் போலுங்

கூற்றினைக்குமைப்பர் போலும்

விஞ்சைய ரிரிய வன்று

வேலைவாய்வந்தெ ழுந்த

நஞ்சணி மிடற்றர் போலும்

நாகவீச்சரவ னாரே.

4.066.7

  திருநாகேச்சுரத்துப் பெருமான் வஞ்சகர்களுக்கு அரியராய், தம்மை விரும்பிய அடியவர்களுக்கு எளியராய், யானைத்தோலைப் போர்த்தவராய், கூற்றுவனை ஒறுத்தவராய், தேவர்கள் அஞ்சி ஓடுமாறு கடலில் தோன்றிப் பரவிய விடம் அணிகண்டராய் உள்ளார்.

646 போகமார் மோடி கொங்கை

புணர்தரு புனிதர்போலும்

வேகமார் விடையர் போலும்

வெண்பொடியாடு மேனிப்

பாகமா லுடையர் போலும்

பருப்பதவில்லர் போலும்

நாகநா ணுடையர் போலும்

நாகவீச்சசரவ னாரே.

4.066.8

  திருநாகேச்சுரத்துப் பெருமான் இன்பம் நிறைந்த காளியின் கொங்கைகளைத் தழுவும் புனிதராய், விரைந்து செல்லும் காளையை உடையவராய், வெண்ணீறணிந்த திருமேனியின் ஒருபாகமாகத் திருமாலை உடையவராய, மேருமலையாகிய வில்லையும், பாம்பாகிய நாணையும் உடையவராய் உள்ளார்.

647 கொக்கரை தாளம் வீணை

பாணிசெய்குழகர் போலும்

அக்கரை யணிவர் போலும்

ஐந்தலை யரவர் போலும்

வக்கரை யமர்வர் போலும்

மாதரை மையல்செய்யும்

நக்கரை யுருவர் போலும்

நாகவீச்சரவ னாரே.

4.066.9

  திருநாகேச்சுரத்துப் பெருமான் கொக்கரை, தாளம், வீணை எனும் இவற்றின் தாளத்திற்கு ஏற்பக் கூத்து நிகழ்த்தும் இளையராய், சங்கு மணியை இடையில் அணிபவராய், ஐந்து தலைகளை உடைய பாம்பினை ஆட்டுபவராய், திருவக்கரைத் திருத்தலத்தில் உகந்தருளியிருப்பவராய், பெண்களை மயக்கும் திகம்பரவடிவினராய் உள்ளார்.

648 வின்மையாற் புரங்கண் மூன்றும்

வெந்தழல் விரித்தார் போலும்

தன்மையா லமரர் தங்க

டலைவர்க்குந்தலைவர் போலும்

வன்மையான் மலையெ டுத்தான்

வலியினைத்தொலைவித் தாங்கே

நன்மையா லளிப்பர் போலும்

நாகவீச் சரவ னாரே.

4.066.10

  திருநாகேச்சுரத்துப் பெருமான் தம் வில்லாற்றலால் மும்மதில்களையும் தீக்கு இரையாக்கியவராய், தம் பண்பினாலே தேவர்களுடைய தலைவர்களுக்கும் தலைவராய், தன் உடல் வலிமையாலே கயிலை மலையைப் பெயர்க்க முற்பட்ட இராவணனது வலிமையைப் போக்கி அவ்விடத்திலேயே அவனுக்கு நன்மை ஏற்படும் வகையில் அருள் செய்தவராவார்.

திருச்சிற்றம்பலம்