நான்காம் திருமுறை-68

4.068.திருவாலங்காடு 

திருநேரிசை 

திருச்சிற்றம்பலம் 

இத்தலம் தொண்டைநாட்டிலுள்ளது. 

சுவாமிபெயர் - ஊர்த்ததாண்டவேசுவரர். 

தேவியார் - வண்டார்குழலியம்மை. 

659 வெள்ளநீர்ச் சடையர்போலும்

விரும்புவார்க் கௌயர் போலும்

உள்ளுளே யுருகி நின்றங்

குகப்பவர்க் கன்பர் போலும்

கள்ளமே வினைக ளெல்லாங்

கரிசறுத் திடுவர்போலும்

அள்ளலம் பழனை மேய

வாலங்காட் டடிக ளாரே.

4.068.1

  வயல்களில் சேறு நிரம்பிய பழையனூரை அடுத்த திருவாலங்காட்டுப் பெருமான் கங்கை சூடிய சடையினராய், விரும்புபவர்களுக்கு எளியவராய், உள்ளத்திலே இறை தியானத்தால் நெகிழ்ச்சியுற்று மகிழும் அடியவர்பால் அன்பராய், நுகர்வோர் காரணம் உணராத வகையில் நுகர்விக்கும் இரு வினைகளின் மாசுகளைப் போக்குபவர் ஆவார்.

660 செந்தழ லுருவர் போலுஞ்

சினவிடை யுடையர்போலும்

வெந்தவெண் ணீறு கொண்டு

மெய்க்கணிந் திடுவர் போலும்

மந்தமாம் பொழிற்ப ழனை

மல்கிய வள்ளல் போலும்

அந்தமி லடிகள் போலு

மாலங்காட் டடிக ளாரே.

4.068.2

  ஆலங்காட்டு அடிகளார் செந்தழல் நிறத்தவராய், கோபம் உடைய காளையை உடையவராய், வெண்ணீற்றைத் திருமேனியில் அணிபவராய், தென்றல் வீசும் சோலைகளை உடைய பழையனூரில் உறையும் வள்ளலாராய்த் தமக்கு ஒரு காலத்தும் இறுதியில்லாத பெருமானாய் உள்ளார்.

661 கண்ணினாற் காம வேளைக்

கனலெழ விழிப்பர் போலும்

எண்ணிலார் புரங்கண் மூன்று

மெரியுணச் சிரிப்பர் போலும்

பண்ணினார் முழவ மோவாப்

பைம்பொழிற் பழனை மேய

அண்ணலா ரெம்மை யாளு

மாலங்காட் டடிக ளாரே.

4.068.3

  நம்மை அடிமை கொள்ளும் ஆலங்காட்டுப் பெருமான் நெற்றிக்கண்ணால் கருவேள் ஆகிய மன்மதனைத் தீயினால் சாம்பலாகுமாறு விழித்தவரும், பகைவருடைய மும்மதில் களும் தீக்கு இரையாகுமாறு சிரித்தவரும், பண்ணுக்குஏற்ப ஒலிக்கும் முழாவின் ஒலி நீங்காததும், சோலைகளை உடையதுமான பழையனூரில் விரும்பித்தங்கிய தலைவரும் ஆவார்.

662 காறிடு விடத்தை யுண்ட

கண்டரெண் டோளர் போலும்

தூறிடு சுடலை தன்னிற்

சுண்ணவெண் ணீற்றர் போலும்

கூறிடு முருவர் போலுங்

குளிர்பொழிற் பழனைமேய

ஆறிடு சடையர் போலு

மாலங்காட் டடிக ளாரே.

4.068.4

  குளிர்ந்த சோலைகளை உடைய பழையனூரைச் சேர்ந்த, கங்கை சூடிய ஆலங்காட்டுப் பெருமான் கொல்லுகின்ற விடத்தை உண்ட கழுத்தினராய், எட்டுத் தோளினராய்த் தூறுகள் மண்டிக் கிடக்கும் சுடுகாட்டு வெள்ளிய சாம்பலைப் பூசியவராய்ப் பார்வதிக்காக இடப்பாகத்தைப் பிரித்துக் கொடுத்துப் பார்வதிபாகராம் உருவினராய் உள்ளார்.

663 பார்த்தனோ டமர் பொருது

பத்திமை காண்பர்போலும்

கூர்த்தவா யம்பு கோத்துக்

குணங்களை யறிவர்போலும்

பேர்த்துமோ ராவ நாழி

யம்பொடுங் கொடுப்பர் போலும்

தீர்த்தமாம் பழனை மேய

திருவாலங் காட னாரே.

4.068.5

  பழையனூரையடுத்த, பாவத்தைப் போக்கும் தூய்மையை உடைய ஆலங்காட்டுப் பெருமான் பார்த்தனோடு போரிட்டு அவனுடைய பக்தியைக் கண்டவராய், கூர்மையான நுனியை உடைய அம்புகளைக் கோத்து அவன் குணங்களை அறிந்தவராய்ப் பின்னும் ஒரு அம்புப் புட்டிலை அத்திரத்தோடு அவனுக்கு வழங்கியவராய் உள்ளார்.

664 வீட்டினார் சுடுவெண் ணீறு

மெய்க்கணிந் திடுவர் போலும்

காட்டினின் றாடல் பேணுங்

கருத்தினையுடையர் போலுங்

பாட்டினார் முழவ மோவாப்

பைம்பொழிற் பழனை மேயார்

ஆட்டினா ரரவந் தன்னை

யாலங்காட் டடிக ளாரே.

4.068.6

  ஆலங்காட்டுப் பெருமான் இறந்தவர்களைக் கொளுத்திய சாம்பலை உடலில் பூசியவராய்ச் சுடுகாட்டிலிருந்து கூத்தாடுதலை விரும்பும் கருத்தினை உடையவராய்ப் பாம்பினை ஆட்டுபவராய்ப் பாடுதலை உடையவராய், முழாவின் ஒலி நீங்காததும், பசுமையான சோலைகளை உடையதுமான பழையனூரை விரும்பி உறைகின்றார்.

665 தாளுடைச் செங் கமலத்

தடங்கொள்சே வடியர் போலும்

நாளுடைக் காலன் வீழ

வுதைசெய்த நம்பர் போலும்

கோளுடைப் பிறவி தீர்ப்பார்

குளிர்பொழிற் பழனை மேய

ஆளுடை யண்ணல் போலு

மாலங்காட் டடிக ளாரே.

4.068.7

  குளிர்ந்த சோலைகளை உடைய பழையனூரை அடுத்த ஆலங்காட்டுப் பெருமான் தண்டினை உடைய செங்கமலப்பூப் போன்ற பெருமை பொருந்திய திருவடிகளை உடையவராய், தனக்கு உயிர்வாழ வேண்டிய நாள்கள் இன்னும் பலவாக உடைய இயமன் அழியுமாறு உதைத்த, நம்மால் விரும்பப்படும் தலைவராய், யாம் வினைவயத்தாற் கொள்ளுதற்குரிய பிறவிகளைப் போக்குபவராய் நம்மை அடிமையாகக்கொள்ளும் தலைவராக உள்ளார்.

666 கூடினா ருமை தனோடே

குறிப்புடை வேடங் கொண்டு

சூடினார் கங்கை யாளைச்

சுவறிடு சடையர் போலும்

பாடினார் சாம வேதம்

பைம்பொழிற் பழனை மேயார்

ஆடினார் காளி காண

வாலங்காட் டடிக ளாரே.

4.068.8

  பசுமையாகிய சோலைகளை உடைய பழையனூரை விரும்புபவராகிய ஆலங்காட்டுப் பெருமான் காதற் குறிப்புடைய வேடத்தைக் கொண்டு பார்வதி பாகராகிக் கங்கையைச் சூடி அதன் பெருக்கைக் குறைத்த சடையினராய்ச் சாமவேதம் பாடினவராய்க் காளிதேவி காண ஆடிய பெருமானாராவார்.

667 வெற்றரைச் சமண ரோடு

விலையுடைக் கூறை போர்க்கும்

ஒற்றரைச் சொற்கள் கொள்ளார்

குணங்களை யுகப்பர் போலும்

பெற்றமே யுகந்தங் கேறும்

பெருமையை யுடையர் போலும்

அற்றங்க ளறிவர் போலு

மாலங்காட் டடிக ளாரே.

4.068.9

  ஆலங்காட்டு அடிகளார் ஆடையற்ற சமணர்களோடு விலைமதிப்புடைய ஆடைகளைப் போர்க்கும் புத்தர்கள் பேசும் ஒன்றும் பாதியுமாகிய சொற்களை ஏற்றுக் கொள்ளாத சிவனடியார்களுடைய குணங்களை விரும்பியவராய், விரும்பிக் காளையை வாகனமாகக் கொள்ளும் பெருமையை உடையவராய்ப் பிறர் அறியாதவாறு மறைத்துச் செய்யும் பாவங்களை அறியும் ஞானமுடையவராய் உள்ளார்.

668 மத்தனாய் மலையெ டுத்த

வரக்கனைக் கரத்தோ டொல்க

ஒத்தினார் திருவி ரலா

லூன்றியிட் டருள்வர் போலும்

பத்தர்தம் பாவந் தீர்க்கும்

பைம்பொழிற் பழனை மேய

அத்தனார் நம்மை யாள்வா

ராலங்காட் டடிக ளாரே.

4.068.10

  ஆலங்காட்டுப் பெருமான் செருக்குற்றவனாய்க் கயிலையைப் பெயர்த்த இராவணனைக் கைகளோடு தளருமாறு விரலை ஊன்றிப் பின் அவனுக்கு அருள் செய்தவராய், பக்தர்களுடைய தீவினைகளைத் தீர்ப்பவராய், பசுமையான சோலைகளை உடைய பழையனூரை விரும்பி உறையும் தலைவராய் நம்மை அடிமை கொள்பவராய் உள்ளார்.

திருச்சிற்றம்பலம்