ஏழாம் திருமுறை-22

7.022.திருப்பழமண்ணிப்படிக்கரை 

பண் - நட்டராகம் 

திருச்சிற்றம்பலம் 

இத்தலம் சோழநாட்டிலுள்ளது. 

சுவாமிபெயர் - நீலகண்டேசுவரர். 

தேவியார் - வடிக்கண்ணமுதகரநாயகியம்மை. 

219 முன்னவன் எங்கள்பிரான் முதல்

காண்பரி தாயபிரான்

சென்னியில் எங்கள்பிரான் திரு 

நீல மிடற்றெம்பிரான்

மன்னிய எங்கள்பிரான் மறை 

நான்குங்கல் லால்நிழற்கீழ்ப்

பன்னிய எங்கள்பிரான் பழ 

மண்ணிப் படிக்கரையே.

7.022.1

  எல்லார்க்கும் முன்னே உள்ளவனும், தனக்கு முன்னுள்ள பொருள் இல்லாதவனும், யாவரினும் தலையாயவனும் அழகிய நீலகண்டத்தை உடையவனும், என்றும் அழியாது நிலைபெற்றிருப்பவனும், நான்கு வேதங்களையும் கல்லால மர நிழலிலிருந்து சொல்லியவனுமாய், எங்கள் தலைவனுமாய் உள்ள இறைவன் எழுந்தருளியிருப்பது, 'திருப்பழமண்ணிப்படிக்கரை' என்னும் தலமே. 

220

அண்ட கபாலஞ்சென்னி அடி

மேல்அலர் இட்டுநல்ல

தொண்டங் கடிபரவித் தொழு

தேத்திநின் றாடுமிடம்

வெண்டிங்கள் வெண்மழுவன் விரை

யார்கதிர் மூவிலைய

பண்டங்கன் மேயவிடம் பழ

மண்ணிப் படிக்கரையே.

7.022.2

  திரண்ட தலையை அணிந்த முடியினையுடைய சிவபிரானது திருவடிகளில் நல்ல அடியார்கள் மலர்களை இட்டு அவ்வடிகளை வணங்கி, முன்னிலையாகவும் படர்க்கையாகவும் துதித்து ஆடுகின்றதும், வெண்மையான பிறையை அணிந்தவனும், வெள்ளிய மழுவை ஏந்தியவனும், பகைவர்மேல் விரைதல் பொருந்திய, ஒளியையுடைய மூவிலை வேலை (சூலத்தை) உடைய, 'பண்டரங்கம்' என்னும் கூத்தினை உடையவனும் ஆகிய அப்பெருமான் விரும்பி எழுந்தருளியிருக்கின்றதும் ஆகிய இடம் 'திருப்பழமண்ணிப் படிக்கரை' என்னும் தலமே. 

221

ஆடுமின் அன்புடையீர் அடிக்

காட்பட்ட தூளிகொண்டு

சூடுமின் தொண்டருள்ளீர் உம

ரோடெமர் சூழவந்து

வாடுமிவ் வாழ்க்கைதன்னை வருந்

தாமல் திருந்தச்சென்று

பாடுமின் பத்தருள்ளீர் பழ

மண்ணிப் படிக்கரையே.

7.022.3

  அன்புடையவர்களே, அன்புக் கூத்தினை ஆடுங்கள்; தொண்டராய் உள்ளவர்களே, சிவபெருமானது திருவடிக்கு ஆட்பட்டவர்களது அடியில் உள்ள பொடியை எடுத்துத் தலைமேல் சூடிக்கொள்ளுங்கள்; பத்தராய் உள்ளவர்களே, உம்மவரோடு எம்மவரும் சூழ ஒன்று கூடி, மனம் மெலிதற்குக் காரணமான இல்வாழ்க்கையில் கிடந்து வருந்தாமல் நன்கு சென்று, திருப்பழமண்ணிப் படிக்கரையைப் பாடுங்கள். 

222

அடுதலை யேபுரிந்தான் அவை

அந்தர மூவெயிலும்

கெடுதலை யேபுரிந்தான் கிள

ருஞ்சிலை நாணியிற்கோல்

நடுதலை யேபுரிந்தான் நரி

கான்றிட்ட எச்சில் வெள்ளைப்

படுதலை யேபுரிந்தான் பழ

மண்ணிப் படிக்கரையே.

7.022.4

  உலகத் தொகுதியை அழித்தலை விரும்பினவனும், வானத்தில் திரிந்த மூன்று மதில்கள் கெட்டொழிதலை விரும்பி வில் நாணில் அம்பைப் பூட்டுதலை விரும்பினவனும், நரி உமிழ்ந்த எச்சிலாகிய, வெண்மையான, அழிந்த தலையை விரும்பியவனும் ஆகிய இறைவன் எழுந்தருளியிருக்கும் இடம், 'திருப்பழமண்ணிப் படிக்கரை' என்னும் தலமே. 

223 உங்கைக ளாற்கூப்பி உகந்

தேத்தித்தொழு மின்தொண்டீர்

மங்கையொர் கூறுடையான் வா

னோர்முத லாயபிரான்

அங்கையில் வெண்மழுவன் அலை

யார்கதிர் மூவிலைய

பங்கய பாதனிடம் பழ

மண்ணிப் படிக்கரையே.

7.022.5

  தொண்டர்களே, உமையை ஒரு கூறில் உடையவனும், தேவர்களுக்கு முதற்பொருளாய தலைவனும், அகங்கையில் வெள்ளிய மழுவை உடையவனும், கொல்லுதல் பொருந்திய ஒளியை யுடைய முத்தலை வேலை (சூலத்தை) ஏந்திய, தாமரை மலர்போலும் பாதங்களையுடையவனும் ஆகிய இறைவனது இடமாகிய திருப்பழ மண்ணிப்படிக்கரையை விரும்பித் துதித்து உங்கள் கைகளால் கூப்பித் தொழுங்கள். 

224

செடிபடத் தீவிளைத்தான் சிலை

யார்மதிற் செம்புனஞ்சேர்

கொடிபடு மூரிவெள்ளை எரு

தேற்றையும் ஏறக்கொண்டான்

கடியவன் காலன்றன்னைக் கறுத்

தான்கழற் செம்பவளப்

படியவன் பாசுபதன் பழ

மண்ணிப் படிக்கரையே.

7.022.6

  கற்கள் பொருந்திய கோட்டைகளில் தீமை உண்டாகத் தீயை எழுவித்தவனும், நல்ல புனங்களில் மேய்வதாகிய, தனது கொடியிற் பொருந்திய வலிய எருதாகிய ஆனேற்றை ஏறுதற்கு ஊர்தியாகவும் கொண்டவனும், பாதத்தால் கொடிய வலிய காலனைக் காய்ந்தவனும், செவ்விய பவளம் போலும் திருமேனியை உடையவனும், பாசுபத வேடத்தனும் ஆகிய இறைவன் எழுந்தருளியிருப்பது, 'திருப்பழமண்ணிப்படிக்கரை' என்னும் தலமே. 

225 கடுத்தவன் தேர்கொண்டோடிக் கயி

லாயநன் மாமலையை

எடுத்தவன் ஈரைந்துவாய் அரக்

கன்முடி பத்தலற

விடுத்தவன் கைநரம்பால் வேத

கீதங்கள் பாடலுறப்

படுத்தவன் பால்வெண்ணீற்றன் பழ

மண்ணிப் படிக்கரையே.

7.022.7

  அரக்கனும், தேரைச் செலுத்திக்கொண்டு சென்று, அதனைத் தடுத்தலால் சினங்கொண்டவனாய்க் கயிலாயமாகிய நல்ல பெரிய மலையை எடுத்தவனும் ஆகிய இராவணனது பத்து வாய்களும் பத்துத் தலைகளில் பொருந்தியிருந்து அலறும்படி ஆக்கியவனும், பின்பு அவன் கை நரம்பாகிய வீணையால் வேதத்தொடு கூடிய இசைகளைப் பாட, அவனை நலத்திற் பொருந்தச் செய்தவனும், பால் போலும் வெள்ளிய திருநீற்றை உடையவனும் ஆகிய இறைவன் எழுந்தருளியிருப்பது, 'திருப்பழமண்ணிப்படிக்கரை' என்னும் தலமே. 

226 திரிவன மும்மதிலும் மெரித்

தான்இமை யோர்பெருமான்

அரியவன் அட்டபுட்பம் மவை

கொண்டடி போற்றிநல்ல

கரியவன் நான்முகனும் மடி

யும்முடி காண்பரிய

பரியவன் பாசுபதன் பழ

மண்ணிப் படிக்கரையே.

7.022.8

  இடம் பெயர்ந்து திரிவனவாகிய மூன்று மதில்களை எரித்தவனும், தேவர்கட்குத் தலைவனும், அடைதற்கு அன்புடைய திருமாலும் பிரமனும் அட்ட புட்பங்களால் திருவடியில் அருச்சித்தும் அடியும் முடியும் காணமாட்டாத அளவிறந்தவனும், பாசுபத வேடத்தை உடையவனும் ஆகிய இறைவன் எழுந்தருளியிருப்பது, 'திருப்பழமண்ணிப்படிக்கரை' என்னும் தலமே. 

227 வெற்றரைக் கற்றமணும் விரை

யாதுவிண் டாலமுண்ணும்

துற்றரைத் துற்றறுப்பான் துன்ன

ஆடைத் தொழிலுடையீர்

பெற்றரைப் பித்தரென்று கரு

தேன்மின் படிக்கரையுள்

பற்றரைப் பற்றிநின்று பழி

பாவங்கள் தீர்மின்களே.

7.022.9

  மிகுந்த பற்றுக்களை அறுத்தற் பொருட்டு உடையில்லாத அரையினை உடையராதலைக் கற்ற சமணர் வேடத்திலே மனம் விரையாது நீங்கி, கீளொடு பிணைத்தலை உடைய கோவண ஆடையை அணிந்த தொண்டர்களே, நஞ்சினை உண்ணும் உணவுடையவரும், எருதாகிய ஊர்தியை உடையவருமாகிய சிவபெருமானாரை அதுபோல்வனவற்றை நோக்கிப் பித்தரென்று இகழ்ச்சியாக நினையாதீர்கள்; திருப்பழமண்ணிப்படிக்கரையுள் கோயில் கொண்டிருக்கும் அவரையே துணையாகப் பற்றிநின்று, பழிபாவங்களிலிருந்து நீங்குங்கள். 

228 பல்லுயிர் வாழுந்தெண்ணீர்ப் பழ

மண்ணிப் படிக்கரையை

அல்லியந் தாமரைத்தார் ஆ

ரூரன் உரைத்ததமிழ்

சொல்லுதல் கேட்டல்வல்லா ரவர்க்

குந்தமர்க் குங்கிளைக்கும்

எல்லியும் நன்பகலும் மிடர்

கூருதல் இல்லையன்றே.

7.022.10

  பல உயிர்கள் வாழ்கின்ற தௌந்த நீரையுடைய, 'திருப்பழமண்ணிப்படிக்கரை' என்னும் தலத்தை, அக இதழ்களையுடைய தாமரை மாலையை அணிந்த நம்பியாரூரன் புகழ்ந்து சொன்ன இத்தமிழ்ப் பாடலை இரவிலும், நல்ல பகலிலும் சொல்லுதலும் கேட்டலும் வல்லராகின்ற அத்தன்மையார்க்கும், அவரைச் சார்ந்து உற்றார்க்கும், அவ்வுற்றாரைப் பற்றி வரும் சுற்றத்தார்க்கும் துன்பம் மிகுதல் இல்லை. 

திருச்சிற்றம்பலம்