ஆறாம் திருமுறை-16

6.016.திருவிடைமருது 

திருத்தாண்டகம் 

திருச்சிற்றம்பலம் 

இத்தலம் சோழநாட்டிலுள்ளது. 

சுவாமிபெயர் - மருதீசர். 

தேவியார் - நலமுலைநாயகியம்மை. 

2244 சூலப் படையுடையார் தாமே போலுஞ்

சுடர்த்திங்கட் கண்ணி யுடையார் போலும்

மாலை மகிழ்ந்தொருபால் வைத்தார் போலும்

மந்திரமுந் தந்திரமு மானார் போலும்

வேலைக் கடல்நஞ்ச முண்டார் போலும்

மேல்வினைகள் தீர்க்கும் விகிர்தர் போலும்

ஏலக் கமழ்குழலாள் பாகர் போலும்

இடைமருது மேவிய ஈச னாரே.

6.016.1

  இடைமருதூர் என்ற திருத்தலத்தை உகந்தருளியிருக்கும் இறைவர் சூலப்படை உடையவராய், ஒளி வீசும் பிறையை முடிமாலையாக அணிந்தவராய், விரும்பித் திருமாலை ஒருபாகமாகக் கொண்டவராய், மந்திரமும் அம்மந்திரங்களைப் பயன்கொள்ளும் செயல்களுமாக அமைந்தவராய், கடலில் தோன்றிய விடத்தை உண்டவராய், ஊழ்வினையை நுகரும்போதே உடன் ஈட்டிக் கொள்ளப்படும் மேல் வினைகளை நீக்கும் வேறுபட்ட இயல்பினராய், நறுமணம் கமழும் கூந்தலை உடைய பார்வதி பாகராய் அமைந்துள்ளார்.

2245 காரார் கமழ்கொன்றைக் கண்ணி போலுங்

காரானை யீருரிவை போர்த்தார் போலும்

பாரார் பரவப் படுவார் போலும்

பத்துப் பல்லூழி பரந்தார் போலும்

சீரால் வணங்கப் படுவார் போலும்

திசையனைத்து மாய்மற்று மானார் போலும்

ஏரார் கமழ்குழலாள் பாகர் போலும்

இடைமருது மேவிய ஈச னாரே.

6.016.2

  இடைமருது மேவிய ஈசனார் கார்காலத்தில் பூக்கும் நறுமணக்கொன்றைப் பூவினை முடிமாலையாக உடையவராய், கரிய யானையின் உதிரப்பசுமை கெடாத தோலினைத் திருமேனியின் மீது போர்த்தியவராய், உலகத்தாரால் முன் நின்று துதிக்கப்படுபவராய்ப் பல ஊழிக்காலங்களையும் அடக்கி நிற்கும் காலமாய் நிற்பவராய், பலரும் தம்முடைய பொருள்சேர் புகழைச் சொல்லி வணங்க நிற்பவராய், பத்துத் திசைகளிலும் உள்ள நிலப் பகுதிகளும் மற்றும் பரவி நிற்பவராய், நறுமணம் கமழும் அழகிய கூந்தலை உடைய பார்வதி பாகராய் அமைந்துள்ளார்.

2246 வேதங்கள் வேள்வி பயந்தார் போலும்

விண்ணுலகும் மண்ணுலகு மானார் போலும்

பூதங்க ளாய புராணர் போலும்

புகழ வளரொளியாய் நின்றார் போலும்

பாதம் பரவப் படுவார் போலும்

பத்தர் களுக்கின்பம் பயந்தார் போலும்

ஏதங்க ளான கடிவார் போலும்

இடைமருது மேவிய ஈச னாரே.

6.016.3

  இடைமருது மேவிய ஈசனார் வேதங்களோடு வேள்விகளைப் படைத்தவராய், விண்ணுலகும் மண்ணுலகும் ஐம்பூதங்களும் தாமேயாகிய பழையவராய்த் தம்மைப் புகழ்வார் உள்ளத்தில் ஞானஒளியாய் நிற்பவராய்த் தம் திருவடிகள் எல்லோராலும் முன்நின்று துதிக்கப்படுவனவாய், அடியார்களுக்கு இன்பம் பயப்பவராய், அவர்களுடைய துன்பங்களையெல்லாம் துடைப்பவராய் அமைந்துள்ளார்.

2247 திண்குணத்தார் தேவர் கணங்க ளேத்தித்

திசைவணங்கச் சேவடியை வைத்தார் போலும்

விண்குணத்தார் வேள்வி சிதைய நூறி

வியன்கொண்டல் மேற்செல் விகிர்தர் போலும்

பண்குணத்தார் பாடலோ டாட லோவாப்

பரங்குன்றம் மேய பரமர் போலும்

எண்குணத்தார் எண்ணா யிரவர் போலும்

இடைமருது மேவிய ஈச னாரே.

6.016.4

  பிற பிறப்புக்களில் உள்ள உயிர்களை அடிமைப்படுத்தி ஆளும் ஆற்றலை உடைய, தேவகணங்கள் தம் திருவடிகளைத் துதித்துத் திசைநோக்கி வணங்குமாறு செய்த இடைமருது மேவிய ஈசர், இந்திரன் செய்த வேள்வியை அழியுமாறு கெடுத்து, மேகவடிவில் வந்த திருமாலை வாகனமாகக் கொண்டு செலுத்திய வேறுபட்ட இயல்பினர். யாழைப் பண்ணும் (சுருதிகூட்டும்) இயல்பினராகிய மகளிரின் ஆடல் பாடல்கள் நீங்காத பரங்குன்றை விரும்பித் தங்கிய பரம்பொருள் ஆவார். எண்ணாயிரவர் என்ற தொகுதியைச் சார்ந்த அந்தணர்கள் வேற்றுத் தெய்வங்களை விடுத்துத் தம்மையே பரம்பொருளாகத் தியானிக்கும் இயல்பினராவர்.

2248 ஊக முகிலுரிஞ்சு சோலை சூழ்ந்த

உயர்பொழில்அண் ணாவி லுறைகின் றாரும்

பாகம் பணிமொழியாள் பாங்க ராகிப்

படுவெண் தலையிற் பலிகொள் வாரும்

மாகமடை மும்மதிலு மெய்தார் தாமு

மணிபொழில்சூழ் ஆரூ ருறைகின் றாரும்

ஏகம்பம் மேயாரு மெல்லா மாவார்

இடைமருது மேவிய ஈச னாரே.

6.016.5

  இடைமருது மேவிய ஈசனார் வானளாவிய சோலைகளிலே குரங்குகள் நடமாடும் அண்ணாமலையிலும், அழகிய பொழில்கள் சூழ்ந்த ஆரூரிலும், கச்சி ஏகம்பத்திலும் உகந்தருளியிருக்கின்றார். பார்வதி பாகராய்ப் பிரமனுடைய மண்டையோட்டில் பிச்சை எடுப்பவர். வானில் உலவிய மும்மதில்களையும் எய்து வீழ்த்தியவர்.எல்லாப் பொருள்களாகவும் உள்ளவர்.

2249 ஐயிரண்டும் ஆறொன்று மானார் போலும்

அறுமூன்றும் நான்மூன்று மானார் போலும்

செய்வினைகள் நல்வினைக ளானார் போலும்

திசையனைத்து மாய்நிறைந்த செல்வர் போலும்

கொய்மலரங் கொன்றைச் சடையார் போலுங்

கூத்தாட வல்ல குழகர் போலும்

எய்யவந்த காமனையுங் காய்ந்தார் போலும்

இடைமருது மேவிய ஈச னாரே.

6.016.6

  இடைமருது மேவிய ஈசனார் பத்துத் திசைகளும், ஏழு இசைகளும், பதினெட்டு வித்தைகளும்,பன்னிரண்டு சூரியர்களும், தீவினைகளும் நல்வினைகளுமாகிப் பத்துத் திசைகளிலும் உள்ள பொருள்கள் யாவுமாய் நிறைந்த செல்வராவார். அவர் கொன்றை சூடிய சடையர். கூத்து நிகழ்த்துதலில் வல்ல இளைஞர். தம் மீது மலரம்புகளைச் செலுத்தவந்த மன்மதனைக் கோபித்தவர்.

2250 பிரியாத குணமுயிர்கட் கஞ்சோ டஞ்சாய்ப்

பிரிவுடைய குணம்பேசிற் பத்தோ டொன்றாய்

விரியாத குணமொருகால் நான்கே யென்பர்

விரிவிலாக் குணநாட்டத் தாறே யென்பர்

தெரிவாய குணமஞ்சுஞ் சமிதை யஞ்சும்

பதமஞ்சுங் கதியஞ்சுஞ் செப்பி னாரும்

எரியாய தாமரைமே லியங்கி னாரும்

இடைமருது மேவிய ஈச னாரே.

6.016.7

  இடைமருது மேவிய ஈசனார் உயிர்களை விட்டு நீங்காத பத்து இயற்கைப் பண்புகளாகவும், உயிர்களுக்கு மலச் சார்பினால் வரும் பதினொரு செயற்கைப் பண்புகளாகவும், பரம் பொருளுக்கு என்று ஒருகால் தொகுத்துச் சொல்லப்படும் நான்கு பண்புகளாகவும், பிறிதொருகால் சொல்லப்படும் ஆறு பண்புகளாகவும் உள்ளனவற்றையும் மெய்ந்நூல்கள் பற்றி ஆராய்ந்து உணரப்படும் பொதுவான ஐம்பண்புகளையும் ஐவகை சமித்துக்களையும், திருவைந்தெழுத்தையும் உயிர்கள் சென்று சேரக்கூடிய வழிகள் ஐந்தையும் குறிப்பிட்டு ஞானப்பிரகாசமாகிய ஒளியை உடைய அடியவர்களின் உள்ளத்தாமரையில் உலவிவருபவராவார்.

2251 தோலிற் பொலிந்த வுடையார் போலுஞ்

சுடர்வா யரவசைத்த சோதி போலும்

ஆலம் அமுதாக வுண்டார் போலும்

அடியார்கட் காரமுத மானார் போலும்

காலனையுங் காய்ந்த கழலார் போலுங்

கயிலாயந் தம்மிடமாக் கொண்டார் போலும்

ஏலங் கமழ்குழலாள் பாகர் போலும்

இடைமருது மேவிய ஈச னாரே.

6.016.8

  இடைமருது மேவிய ஈசனார் தோலுடையை உடுத்து அதன்மேல் ஒளிவாய்ந்த பாம்பினை இறுக்கிக் கட்டிய சோதி வடிவானவர். விடத்தையே அமுதம்போல உண்டவர். அடியவர்களுக்கு அமுதம் போல் இனியவர். காலனை வெகுண்டுதைத்த திருவடியை உடையவர். கயிலாயத்தை நிலையான இடமாக உடையவர். நறுமணம் வீசும் கூந்தலை உடைய பார்வதி பாகர்.

2252 2152.பைந்தளிர்க் கொன்றையந் தாரார் போலும்

படைக்கணாள் பாக முடையார் போலும்

அந்திவாய் வண்ணத் தழகர் போலும்

அணிநீல கண்ட முடையார் போலும்

வந்த வரவுஞ் செலவு மாகி

மாறாதென் னுள்ளத் திருந்தார் போலும்

எந்தம் இடர்தீர்க்க வல்லார் போலும்

இடைமருது மேவிய ஈச னாரே.

6.016.9

  இடைமருது மேவிய ஈசனார் பசிய தளிர்கள் இடையே தோன்றும் கொன்றைப் பூமாலையர். வேல்போன்ற கண்களை உடைய பார்வதி பாகர். மாலை வானம் போன்றசெந்நிற அழகர். அழகிய நீலகண்டர் உலகில் பிறப்புக்களையும் இறப்புக்களையும் நிகழ்வித்து என் உள்ளத்தில் நீங்காதிருப்பவர். அடியார்களுடைய இடர்களைத் தீர்த்து அவர்களைக் காக்கும் இயல்பினர்.

2253 கொன்றையங் கூவிள மாலை தன்னைக்

குளிர்சடைமேல் வைத்துகந்த கொள்கை யாரும்

நின்ற அனங்கனை நீறா நோக்கி

நெருப்புருவ மாய்நின்ற நிமல னாரும்

அன்றவ் வரக்கன் அலறி வீழ

அருவரையைக் காலா லழுத்தி னாரும்

என்று மிடுபிச்சை யேற்றுண் பாரும்

இடைமருது மேவிய ஈச னாரே.

6.016.10

  இடைமருது மேவிய ஈசனார் கொன்றை மலரோடு வில்வமாலையைக் குளிர்ந்த சடைமீது வைத்து மகிழ்ந்த இயல்பினர். தம்மீது அம்பு எய்ய இருந்தமன்மதனைச் சாம்பலாக்கி நெருப்பு வடிவாய் நின்ற தூயவர். இராவணன் கயிலை மலையைப் பெயர்க்க முற்பட்ட அன்று அவன் அலறி விழுமாறு அம்மலையைக் காலால் அழுத்தியவர். என்றும் மற்றவர் இடும் பிச்சையை வாங்கி உண்பவர்.

திருச்சிற்றம்பலம்