ஆறாம் திருமுறை-19

6.019.திருவாலவாய் 

திருத்தாண்டகம் 

திருச்சிற்றம்பலம் 

இத்தலம் பாண்டிநாட்டிலுள்ளது. இதுவே மதுரை. 

சுவாமிபெயர் - சொக்கநாதசுவாமி. 

தேவியார் - மீனாட்சியம்மை. 

2275 முளைத்தானை யெல்லார்க்கும் முன்னே தோன்றி

முதிருஞ் சடைமுடிமேல் முகிழ்வெண் திங்கள்

வளைத்தானை வல்லசுரர் புரங்கள் மூன்றும்

வரைசிலையா வாசுகிமா நாணாக் கோத்துத்

துளைத்தானைச் சுடுசரத்தால் துவள நீறாத்

தூமுத்த வெண்முறுவ லுமையோ டாடித்

திளைத்தானைத் தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.1

  எல்லாப் பொருள்களின் தோற்றத்திற்கும் தான் முன்னே நிற்பவனாய், செறிந்த சடைமுடிமேல் பிறையை வளைவாகச் சூடியவனாய், அசுரர்களுடைய மும்மதில்களையும் மேருமலையை வில்லாகவும் வாசுகி என்ற பாம்பினை நாணாகவும் கொண்டு கொடிய அம்பினாலே அழிந்து சாம்பலாகும்படி அழித்தவனாய், தூயமுத்துப் போன்ற பற்களை உடைய உமாதேவியோடு விளையாடி மகிழ்ந்தவனாய் அழகிய மதுரை மாநகரத்து ஆலவாய் ஆகிய திருக்கோயிலில் உகந்தருளியிருக்கும் சிவபெருமானுடைய திருவடிகளையே தியானிக்கும் வாய்ப்பினை யான்பெற்றுள்ளேனே என்று தாம் பெற்ற பேற்றின் அருமையை உணர்ந்து கூறியவாறாம்.

2276 விண்ணுலகின் மேலார்கள் மேலான் தன்னை

மேலாடு புரமூன்றும் பொடிசெய் தானைப்

பண்ணிலவு பைம்பொழில்சூழ் பழனத் தானைப்

பசும்பொன்னின் நிறத்தானைப் பால்நீற் றானை

உண்ணிலவு சடைக்கற்றைக் கங்கை யாளைக்

கரந்துமையோ டுடனாகி யிருந்தான் தன்னைத் 

தெண்ணிலவு தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.2

  தேவருலகிலுள்ள மேலாருக்கும் மேலாயவனாய், வானத்தில் உலவிய முப்புரங்களையும் அழித்தவனாய், வண்டுகளின் பண்ணோசை நிலைபெற்ற பசிய பொழில்களை உடைய பழன நகரில் உள்ளானாய், பசும் பொன்நிறத்தனாய்,வெண்ணீறு அணிந்தவனாய், சடைக்கற்றைக்குள் அடங்கிய கங்கையை உடையவனாய், உமையோடு வெளிப்படையாக உடனாகியும் அவளைத் தன் உருவில் மறைத்தும் இருப்பவனாய்த் தௌந்த ஞானம் உடையார் பலரும் தங்கியிருக்கும் தென்கூடல் ஆலவாயில் உள்ள சிவனடியே சிந்திக்கப் பெற்றேன் நானே.

2277 நீர்த்திரளை நீள்சடைமேல் நிறைவித் தானை

நிலமருவி நீரோடக் கண்டான் தன்னைப்

பாற்றிரளைப் பயின்றாட வல்லான் தன்னைப்

பகைத்தெழுந்த வெங்கூற்றைப் பாய்ந்தான் தன்னைக்

காற்றிரளாய் மேகத்தி னுள்ளே நின்று

கடுங்குரலா யிடிப்பானைக் கண்ணோர் நெற்றித்

தீத்திரளைத் தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.3

  கங்கையை நீண்ட சடையில் தங்கச் செய்தவனாய், பின் பகீரதன் பொருட்டாகஅதன் ஒரு பகுதயை நிலத்தின்கண் பெருகி ஓடவிட்டவனாய், பால், தயிர், நெய்என்பவற்றின் அபிடேகத்தைப் பலகாலும் உடையவனாய், பகை கொண்டு வந்தகொடிய கூற்றுவனைத் தண்டித்தவனாய், காற்றின் திரட்சியாய் மேகத்தின்உள்ளே இருந்து கொடிய இடியாக ஓசை எழுப்புபவனாய், நெற்றியின் கண்தீத்திரட்சி போன்ற கண்ணை உடையவனாய் உள்ள தென் கூடல் திருவாலவாய்ச்சிவன் அடியே சிந்திக்கப் பெற்றேன் நானே.

2278 வானமிது வெல்லா முடையான் தன்னை

வரியரவக் கச்சானை வன்பேய் சூழக்

கானமதில் நடமாட வல்லான் தன்னைக்

கடைக்கண்ணால் மங்கையையு நோக்கா வென்மேல்

ஊனமது வெல்லா மொழித்தான் தன்னை

யுணர்வாகி யடியேன துள்ளே நின்ற

தேனமுதைத் தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.4

  வான் உலகினையும் நிலவுலகினையும் தன் உடைமையாக உடையவனாய்ப் பாம்பினைக் கச்சாக அணிந்தவனாய் வலிய பேய்கள் சூழச்சுடுகாட்டில் கூத்தாட வல்லவனாய், தன் கடைக்கண்களால் உமாதேவியை நோக்கி அவள் பரிந்துரைத்த குறிப்பினையும் பெற்று என்பால் உள்ள குறைகளை எல்லாம் நீக்கினவனாய், அடியேன் உள்ளத்துள்ளே ஞானவடிவினனாய் நின்று தேன் போலவும் அமுது போலவும் இனியனாய் உள்ள தென் கூடல் திருவாலவாய்ச் சிவனடியே சிந்திக்கப்பெற்றேன் நானே.

2279 ஊரானை யுலகேழாய் நின்றான் தன்னை

யொற்றைவெண் பிறையானை யுமையோ டென்றும்

பேரானைப் பிறர்க்கென்று மரியான் தன்னைப்

பிணக்காட்டில் நடமாடல் பேயோ டென்றும்

ஆரானை அமரர்களுக் கமுதீந் தானை

அருமறையால் நான்முகனும் மாலும் போற்றும்

சீரானைத் தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.5

  கயிலை மலையை இருப்பிடமாக உடைய வனாய், ஏழுலகமும் பரந்து இருப்பவனாய், ஒற்றைப்பிறையை அணிந்தவனாய், உமாதேவியை விடுத்து என்றும் நீங்காதவனாய், அடியார் அல்லாதார் நினைத்தற்கு அரியனாய், பேயோடு எந்நாளும் சுடுகாட்டில் கூத்தாடுதலில் தெவிட்டாதவனாய், தான் விடத்தை உண்டு அமரர்களுக்கு அமுதம் ஈந்தவனாய், வேதமந்திரங்களைக் கூறிப் பிரமனும் திருமாலும் துதிக்கும் புகழுடையவனாய் உள்ள தென் கூடல் திருவாலவாய்ச் சிவனடியே சிந்திக்கப் பெற்றேன் நானே.

2280 மூவனை மூர்த்தியை மூவா மேனி

யுடையானை மூவுலகுந் தானே யெங்கும்

பாவனைப் பாவ மறுப்பான் தன்னைப்

படியெழுத லாகாத மங்கை யோடு

மேவனை விண்ணோர் நடுங்கக் கண்டு

விரிகடலின் நஞ்சுண் டமுத மீந்த

தேவனைத் தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.6

  யாவரினும் முற்பட்டவனாய், அடியார்கள் விரும்பிய வடிவில் காட்சி வழங்குபவனாய், என்றும் மூத்தலில்லாத திருமேனியை உடையவனாய், தானே மூவுலகம் முழுதும் பரவியிருப்பவனாய், அடியவர்களின் தீவினையைப் போக்குபவனாய், ஓவியத்து எழுதவொண்ணா அழகிய உமையோடு விரும்பியிருப்பவனாய், தேவர்கள் நடுங்குதலைக் கண்டு கடலில் தோன்றிய நஞ்சினை உண்டு அமுதத்தை ஈந்ததேவனாய் உள்ள தென்கூடல் திருவாலவாய்ச் சிவனடியே சிந்திக்கப் பெற்றேன் நானே.

2281 துறந்தார்க்குத் தூநெறியாய் நின்றான் தன்னைத்

துன்பந் துடைத்தாள வல்லான் தன்னை

இறந்தார்க ளென்பே யணிந்தான் தன்னை

யெல்லி நடமாட வல்லான் தன்னை

மறந்தார் மதில்மூன்றும் மாய்த்தான் தன்னை

மற்றொருபற் றில்லா அடியேற் கென்றும்

சிறந்தானைத் தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.7

  பற்றறுத்த சான்றோருக்குப் பற்றுக்கோடாகும் வழியாய் இருப்பவனாய், அடியார்களுடைய துன்பத்தைப் போக்கி அவர்களை ஆட்கொள்ள வல்லவனாய், இறந்தவர்களுடைய எலும்பையே அணிந்தவனாய், இரவில் கூத்தாடவல்லவனாய்த் தன்னை மறந்த அசுரர்களின் மும்மதில்களையும் அழித்தவனாய், வேறுபற்றில்லாத அடியார்களுக்கு என்றும் மேம்பட்டு அருளுபவனாய் உள்ள தென்கூடல் திருவாலவாய்ச் சிவனடியே சிந்திக்கப் பெற்றேன் நானே.

2282 வாயானை மனத்தானை மனத்துள் நின்ற

கருத்தானைக் கருத்தறிந்து முடிப்பான் தன்னைத்

தூயானைத் தூவெள்ளை யேற்றான் தன்னைச்

சுடர்த்திங்கட் சடையானைத் தொடர்ந்து நின்றென்

தாயானைத் தவமாய தன்மை யானைத் 

தலையாய தேவாதி தேவர்க் கென்றும்

சேயானைத் தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.8

  வாயுள்ளும் மனத்துள்ளும் மனத்தில் தோன்றும் எண்ணத்துள்ளும் தங்கி, அவர்களுடைய விருப்பங்களை அறிந்து நிறைவேற்றுபவனாய், மாசற்றவனாய், கலப்பற்ற வெள்ளை நிறக் காளையை உடையவனாய், பிறையைச்சடையில் சூடியவனாய், தொடர்ந்து எனக்குத் தாய்போல உதவுபவனாய்த் தவத்தின் பயனாக உள்ளவனாய், மேம்பட்ட தேவர்கள் தலைவராய திருமால் பிரமன் இந்திரன் முதலியவர்களுக்கு என்றும் சேய்மையிலுள்ளவனாய் இருக்கும்தென் கூடல் திருவாலவாய்ச் சிவனடியே சிந்திக்கப் பெற்றேன் நானே.

2283 பகைச்சுடராய்ப் பாவ மறுப்பான் தன்னைப்

பழியிலியாய் நஞ்சுண் டமுதீந் தானை

வகைச்சுடராய் வல்லசுரர் புரமட் டானை

வளைவிலியா யெல்லார்க்கு மருள்செய் வானை

மிகைச்சுடரை விண்ணவர்கண் மேலப் பாலை

மேலாய தேவாதி தேவர்க் கென்றும்

திகைச்சுடரைத் தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.9

  தீவினையாகிய இருளைப் போக்கும் ஞானச் சுடராய், அடியார்களின் பாவங்களைப் போக்குபவனாய்ப் பழி ஏதும் இல்லாதவனாய் நஞ்சினை உண்டுதேவர்க்கு அமுதம் ஈந்தவனாய்க் கிளைத்தெழுந்த தீயாகி அசுரருடையமும் மதில்களையும் அழித்தவனாய், நடுவுநிலை தவறாதவனாய் எல்லா உயிர்களுக்கும் அருள் செய்பவனாய், மேலான ஒளிவடிவினனாய், விண்ணவர்களுக்கு மேலும் உயர்வுதரும் அப்பக்தியாய் உள்ளவனாய், மேம்பட்ட தேவர்களுக்கும் ஒளிகாட்டும் கலங்கரை விளக்காக உள்ள தென்கூடல் திருவாலவாய்ச் சிவனடியே சிந்திக்கப் பெற்றேன் நானே.

2284 மலையானை மாமேரு மன்னி னானை

வளர்புன் சடையானை வானோர் தங்கள்

தலையானை யென்தலையி னுச்சி யென்றுந்

தாபித் திருந்தானைத் தானே யெங்கும்

துலையாக வொருவரையு மில்லா தானைத்

தோன்றாதார் மதில்மூன்றுந் துவள எய்த

சிலையானைத் தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.10

  கயிலை மலையை உடையவனாய், மேரு மலையில் தங்கியிருப்பவனாய், வளர்ந்த செஞ்சடையினனாய், வானோருள் மேம்பட்டவனாய், என் தலையின் உச்சியில் என்றும் நிலைபெற்றிருப்பவனாய், எங்கும் தனக்கு நிகராவார் இல்லாதவனாய்த் தன்னை அணுகாது பகையைப்பூண்ட அசுரர் மதில்கள் மூன்றும் அழியுமாறு பயன்படுத்திய வில்லை உடையவனாய் இருக்கும் தென்கூடல் திருவாலவாய்ச் சிவனடியே சிந்திக்கப் பெற்றேன் நானே.

2285 தூர்த்தனைத் தோள்முடிபத் திறுத்தான் தன்னைத்

தொன்னரம்பின் இன்னிசைகேட் டருள்செய் தானைப்

பார்த்தனைப் பணிகண்டு பரிந்தான் தன்னைப்

பரிந்தவற்குப் பாசுபதம் ஈந்தான் தன்னை

ஆத்தனை யடியேனுக் கன்பன் தன்னை

யளவிலாப் பல்லூழி கண்டு நின்ற

தீர்த்தனைத் தென்கூடல் திருவா லவாய்ச்

சிவனடியே சிந்திக்கப் பெற்றேன் நானே.

6.019.11

  பிறன் மனைவியை விரும்பிய இராவணனுடைய தோள்களையும் பத்துத்தலைகளையும் நசுக்கியவனாய், பின் அவன் எழுப்பிய வீணை இசைகேட்டு அருள் செய்தவனாய், அருச்சுனனுடைய தொண்டினைக் கண்டு அவனுக்கு இரங்கிப் பாசுபதாத்திரம் ஈந்தவனாய், நம்பத்தகுந்தவனாய், அடியேன் மாட்டு அன்பு உடையவனாய், அளவற்றபல ஊழிக்காலங்களையும் கண்டும் தன் நிலைபேற்றில் மாறுபடாது இருக்கும் பரிசுத்தனாகிய தென்கூடல் திருவாலவாய்ச் சிவனடியே சிந்திக்கப் பெற்றேன் நானே.

திருச்சிற்றம்பலம்