ஆறாம் திருமுறை-36

6.036.திருப்பழனம் 

திருத்தாண்டகம் 

திருச்சிற்றம்பலம் 

இத்தலம் சோழநாட்டிலுள்ளது. 

சுவாமிபெயர் - ஆபத்சகாயர். 

தேவியார் - பெரியநாயகியம்மை. 

2445 அலையார் கடல்நஞ்ச முண்டார் தாமே

அமரர்களுக் கருள்செய்யும் ஆதி தாமே

கொலையாய கூற்ற முதைத்தார் தாமே

கொல்வேங்கைத் தோலொன் றசைத்தார் தாமே

சிலையால் புரமூன் றெரித்தார் தாமே

தீநோய் களைந்தென்னை யாண்டார் தாமே

பலிதேர்ந் தழகாய பண்பர் தாமே

பழன நகரெம் பிரானார் தாமே.

6.036.1

  திருப்பழனத்திலே உகந்தருளி உறையும் எம்பெருமான் அலைகள் பொருந்திய கடலின் நஞ்சினை உண்டவர். தேவர்களுக்கு அருள் செய்யும் முதற்பொருள். உயிர்களைக் கவரும் கூற்றினை உதைத்தவர். தம்மால் கொல்லப்பட்ட வேங்கைப் புலியின் தோலை உடுத்தவர். வில்லால் திரிபுரத்தை எரித்தவர். கொடிய சூலை நோயைப் போக்கி என்னை ஆட் கொண்டவர். பிச்சை எடுக்கும் நிலையிலும் அழகான பண்புடையவர்.

2446 வெள்ள மொருசடைமே லேற்றார் தாமே

மேலார்கண் மேலார்கண் மேலார் தாமே

கள்ளங் கடிந்தென்னை யாண்டார் தாமே

கருத்துடைய பூதப் படையார் தாமே

உள்ளத் துவகை தருவார் தாமே

யுறுநோய் சிறுபிணிகள் தீர்ப்பார் தாமே

பள்ளப் பரவைநஞ் சுண்டார் தாமே

பழன நகரெம் பிரானார் தாமே.

6.036.2

  பழன நகர் எம்பிரானார் ஒற்றைச் சடையிலே கங்கை வெள்ளத்தை ஏற்றவர். மேம்பட்டவர் எல்லோருக்கும் மேம்பட்டவர். வஞ்சத்தைப் போக்கி என்னை ஆட்கொண்டவர். ஞானம் பெற்ற பூதங்களைப் படையாக உடையவர். தம்மை நினைக்கும் மனத்திற்கு மகிழ்ச்சி தருபவர். தீராத பெரிய நோய்க ளையும், சிறிய நோய்களையும் தீர்ப்பவர். ஆழமான கடலில் தோன்றிய நஞ்சினை உண்டவர்.

2447 இரவும் பகலுமாய் நின்றார் தாமே

எப்போதும் என்நெஞ்சத் துள்ளார் தாமே

அரவ மரையில் அசைத்தார் தாமே

அனலாடி யங்கை மறித்தார் தாமே

குரவங் கமழுங்குற் றாலர் தாமே

கோலங்கள் மேன்மே லுகப்பார் தாமே

பரவும் அடியார்க்குப் பாங்கர் தாமே

பழன நகரெம் பிரானார் தாமே.

6.036.3

  பழன நகர் எம்பிரானார் இரவும் பகலும் எப்போதும் என் நெஞ்சத்து உள்ளவராய்ப் பாம்பினை இடையில் இறுக்கிக் கட்டியவராய்த் தீயில் கூத்தாடித் தம் கையால் எல்லோருக்கும் 'அஞ்சன்மின்' என்று அபயம் அளிப்பவராய்க் குரா மலர் மணம் கமழும் குற்றாலத்தில் உறைபவராய்ப் பலபல வேடங்களை விரும்பு பவராய்த் தம்மை வழிபடும் அடியவர்களுக்கு என்றும் பக்கலில் இருந்து உதவுபவர்.

2448 மாறில் மதில்மூன்று மெய்தார் தாமே

வரியரவங் கச்சாக வார்த்தார் தாமே

நீறுசேர் திருமேனி நிமலர் தாமே

நெற்றி நெருப்புக்கண் வைத்தார் தாமே

ஏறுகொடுஞ் சூலக் கையர் தாமே

யென்பா பரண மணிந்தார் தாமே

பாறுண் தலையிற் பலியார் தாமே

பழன நகரெம் பிரானார் தாமே.

6.036.4

  பழன நகர் எம்பிரானார் தமக்கு நிகரில்லாத மதில்கள் மூன்றனையும் அழித்தவராய்க் கோடுகளை உடைய பாம்பினைக் கச்சாக அணிந்தவராய், திருநீறணிந்த தூயவராய், நெற்றியில் அக்கினியாகிய கண்ணை உடையவராய்க் கொடிய சூலத்தை ஏந்தியவராய், எலும்புகளை அணிகளாக அணிந்தவராய்ப் பருந்துகள் புலால் நாற்றமறிந்து வட்டமிடும் மண்டையோட்டில் பிச்சை ஏற்பவராய் உள்ளார்.

2449 சீரால் வணங்கப் படுவார் தாமே

திசைக்கெல்லாந் தேவாகி நின்றார் தாமே

ஆரா அமுதமு மானார் தாமே

யளவில் பெருமை யுடையார் தாமே

நீறார் நியமம் உடையார் தாமே

நீள்வரைவில் லாக வளைத்தார் தாமே

பாரார் பரவப் படுவார் தாமே

பழன நகரெம் பிரானார் தாமே.

6.036.5

  பழன நகர் எம்பிரானார் எல்லோராலும் புகழ்ந்து வணங்கப் படுபவராய், எண் திசைகளுக்கும் உரிய தேவராய், தெவிட்டாத அமுதம் ஆவாராய், எல்லையற்ற பெருமை உடையவராய், நீர்வளம் பொருந்திய நியமம் என்ற திருத்தலத்தை உடையவராய், மேருமலையை வில்லாக வளைத்தவராய், எல்லா உலகத்தாராலும் முன் நின்று துதிக்கப்படுபவர் ஆவர்.

2450 காலனுயிர் வெளவ வல்லார் தாமே

கடிதோடும் வெள்ளை விடையார் தாமே

கோலம் பலவு முகப்பார் தாமே

கோணாகம் நாணாகப் பூண்டார் தாமே

நீலம் பொலிந்த மிடற்றார் தாமே

நீள்வரையி னுச்சி யிருப்பார் தாமே

பால விருத்தரு மானார் தாமே

பழன நகரெம் பிரானார் தாமே.

6.036.6

  பழன நகர் எம்பிரானார் காலன் உயிரைப் போக்க வல்லவராய், விரைந்து ஓடும் வெள்ளை நிறக் காளையை உடைய வராய்ப் பல வேடங்களையும் விரும்புபவராய்க் கொடிய பாம்பினைத் தம் வில்லின் நாணாக இணைத்தவராய், நீல கண்டராய்க் கயிலாயத் தின் உச்சியில் உள்ளாராய், பாலன் மூத்தோன் முதலிய எல்லாப் பருவங்களையும் உடையவராய் உள்ளார்.

2451 ஏய்ந்த வுமைநங்கை பங்கர் தாமே

யேமூழிக் கப்புறமாய் நின்றார் தாமே

ஆய்ந்து மலர்தூவ நின்றார் தாமே

அளவில் பெருமை யுடையார் தாமே

தேய்ந்த பிறைசடைமேல் வைத்தார் தாமே

தீவாய் அரவதனை யார்த்தார் தாமே

பாய்ந்த படர்கங்கை யேற்றார் தாமே

பழன நகரெம் பிரானார் தாமே.

6.036.7

  பழன நகர் எம்பிரானார் தமக்குப் பொருந்திய பார்வதி பாகராய், ஏழு ஊழிக்காலங்களுக்கும் அப்பாற்பட்டவராய், அடியார்கள் மலர்களைத் தூய்மை செய்து அணிவிக்க அவற்றை ஏற்று நிற்பவராய், எல்லை கடந்த பெருமை உடையவராய், உருவில் சிறிய பிறையைச் சடையில் அணிந்தவராய், விடம் கக்கும் வாயினை உடைய பாம்பினை இடையில் இறுக்கிக் கட்டியவராய்த் தேவருலகிலிருந்து கீழ்நோக்கிப் பாய்ந்த கங்கையைச் சடையில் ஏற்றவராய் உள்ளார்.

2452 ஓராதா ருள்ளத்தில் நில்லார் தாமே

யுள்ளூறும் அன்பர் மனத்தார் தாமே

பேராதென் சிந்தை யிருந்தார் தாமே

பிறர்க்கென்றுங் காட்சிக் கரியார் தாமே

ஊராரு மூவுலகத் துள்ளார் தாமே

யுலகை நடுங்காமற் காப்பார் தாமே

பாரார் முழவத் திடையார் தாமே

பழன நகரெம் பிரானார் தாமே.

6.036.8

  பழன நகர் எம்பிரானார் தம்மை நினையாதவர் உள்ளத்தில் நிலையாக இல்லாதவராய், உள்ளத்தில் அன்பு சுரந்து பெருகுகின்ற அன்பர்கள் உள்ளத்தில் நிலையாக இருப்பவராய், என் உள்ளத்தை விட்டு அகலாது இருப்பவராய், தம் அடியவர் அல்லாத பிறருக்குக் காண்பதற்கு அரியவராய், ஊர்கள் நிறைந்த மூவுலகத்தும் பரவியிருப்பவராய், உலகம் துயரால் நடுங்காதபடி காப்பவராய், இவ்வுலகைச் சூழ்ந்த கடல்களிலும் பரவியிருப்பவராய் உள்ளார்.

2453 நீண்டவர்க்கோர் நெருப்புருவ மானார் தாமே

நேரிழையை யொருபாகம் வைத்தார் தாமே

பூண்டரவைப் புலித்தோல்மே லார்த்தார் தாமே

பொன்னிறத்த வெள்ளச் சடையார் தாமே

ஆண்டுலகே ழனைத்தினையும் வைத்தார் தாமே

அங்கங்கே சிவமாகி நின்றார் தாமே

பாண்டவரிற் பார்த்தனுக்குப் பரிந்தார் தாமே

பழன நகரெம் பிரானார் தாமே.

6.036.9

  பழனநகர் எம்பிரானார் திருமாலுக்கு அடியினைக் காணமுடியாத தீப் பிழம்பின் வடிவில் காட்சி வழங்கியவராய், பார்வதி பாகராய், புலித்தோல் மீது பாம்பினை இறுகக் கட்டி இடையில் அணிபவராய், செஞ்சடையில் கங்கை வெள்ளத்தைத் தேக்கியவராய், ஏழு உலகங்களையும் படைத்து ஆள்பவராய், பல இடங்களிலும் சிவமாகிக் காட்சி வழங்குபவராய், பாண்டவரில் அருச்சுனனுக்கு இரங்கிப் படைகள் வழங்கி அருள்புரிந்தவராய் உள்ளார்.

2454 விடையேறி வேண்டுலகத் திருப்பார் தாமே

விரிகதிரோன் சோற்றுத் துறையார் தாமே

புடைசூழத் தேவர் குழாத்தார் தாமே

பூந்துருத்தி நெய்த்தானம் மேயார் தாமே

அடைவே புனல்சூழ்ஐ யாற்றார் தாமே

அரக்கனையும் ஆற்ற லழித்தார் தாமே

படையாப் பல்பூத முடையார் தாமே

பழன நகரெம் பிரானார் தாமே.

6.036.10

  பழன நகர் எம்பிரானார் காளையை இவர்ந்து தாம் விரும்பிய உலகத்து இருப்பவராய்ச் சூரியன் வழிபடும் சோற்றுத் துறையில் உறைபவராய்த் தேவர் கூட்டத்தால் நாற்பக்கமும் சூழப் பெற்றவராய்ப் பூந்துருத்தியையும் நெய்த்தானத்தையும் விரும்பியவராய், அடுத்துப் புனல்சூழும் திருவையாற்றை உகந்தருளி உறைபவராய், இராவணனுடைய ஆற்றலை அழித்தவராய்ப் பூதங்களைப் படையாக உடையவராய் உள்ளார்.

திருச்சிற்றம்பலம்