ஆறாம் திருமுறை-43

6.043.திருப்பூந்துருத்தி 

திருத்தாண்டகம் 

திருச்சிற்றம்பலம் 

இத்தலம் சோழநாட்டிலுள்ளது. 

சுவாமிபெயர் - புஷ்பவனநாதர். 

தேவியார் - அழகாலமர்ந்தநாயகி. 

2513 நில்லாத நீர்சடைமேல் நிற்பித் தானை

நினையாவென் நெஞ்சை நினைவித் தானைக்

கல்லா தனவெல்லாங் கற்பித் தானைக்

காணா தனவெல்லாங் காட்டி னானைச்

சொல்லா தனவெல்லாஞ் சொல்லி யென்னைத்

தொடர்ந்திங் கடியேனை யாளாக் கொண்டு

பொல்லாவென் நேர்ய்தீர்த்த புநிதன் தன்னைப்

புண்ணியனைப் பூந்துருத்திக் கண்டேன் நானே.

6.043.1

  கங்கையைச் சடையில் இருத்தி, அவனை நினையாத என் மனத்தை அவனை நினைக்கச் செய்து, அரும் பேருண்மைகளை எல்லாம் சொல்லி, என்னைத் தொடர்ந்து, என்னை அடிமையாகக் கொண்டு, கொடிய சூலை நோயைத் தீர்த்து எனக்குக் காணாதன எல்லாம் காட்டிய தூயோனாகிய புண்ணியனைப் பூந்துருத்தியில் யான் கண்டேன்.

2514 குற்றாலங் கோகரணம் மேவி னானைக்

கொடுங்கைக் கடுங்கூற்றைப் பாய்ந்தான் தன்னை

உற்றால நஞ்சுண் டொடுக்கி னானை

யுணராவென் நெஞ்சை யுணர்வித் தானைப்

பற்றாலின் கீழங் கிருந்தான் தன்னைப்

பண்ணார்ந்த வீணை பயின்றான் தன்னைப்

புற்றா டரவார்த்த புநிதன் தன்னைப்

புண்ணியனைப் பூந்துருத்திக் கண்டேன் நானே.

6.043.2

  குற்றாலம் கோகரணம் இவற்றை விரும்பி உறைந்து கொடிய செயலை உடைய கடியவனாகிய கூற்றுவனை ஒறுத்து, ஆலகால விடத்தை உண்டு கழுத்தில் இருத்தி, உணராத என் நெஞ்சத்தில் அரும் பேருண்மைகளை உணர்வித்து, கல்லால மரத்தின் கீழ் அதனைச் சார்பாகக் கொண்டிருந்து, பண் நிறைந்த வீணையை வாசித்து, புற்றிலிருக்கும் படம் எடுத்தாடும் பாம்பினை இறுக அணிந்த தூயோனாகிய புண்ணியனை நான் பூந்துருத்தியில் கண்டேன்.

2515 எனக்கென்றும் இனியானை யெம்மான் தன்னை

யெழிலாரும் ஏகம்பம் மேயான் தன்னை

மனக்கென்றும் வருவானை வஞ்சர் நெஞ்சில்

நில்லானை நின்றியூர் மேயான் தன்னைத்

தனக்கென்றும் அடியேனை யாளாக் கொண்ட

சங்கரனைச் சங்கவார் குழையான் தன்னைப்

புனக்கொன்றைத் தாரணிந்த புநிதன் தன்னைப்

பொய்யிலியைப் பூந்துருத்திக் கண்டேன் நானே.

6.043.3

  ஏகம்பம் நின்றியூர் இவற்றில் தங்குபவனாய், எனக்கு என்றும் இனிய எம் தலைவனாய், மனத்தில் என்றும் இருப்பவனாய், வஞ்சகர் நெஞ்சில் நில்லாதவனாய், என்னைத் தனக்கு என்றும் ஆளாகக் கொண்டு நன்மை செய்கின்றவனாய், சங்கினால் ஆகிய நீண்ட காதணியை உடையவனாய் மேட்டு நிலத்தில் வளரும் கொன்றைப் பூமாலை அணிந்த தூயோனாகிய, பாசம் இல்லாதவனை, யான் பூந்துருத்தியில் கண்டேன்.

2516 வெறியார் மலர்க்கொன்றை சூடி னானை

வெள்ளானை வந்திறைஞ்சும் வெண்காட் டானை

அறியா தடியே னகப்பட் டேனை

அல்லற்கடல் நின்று மேற வாங்கி

நெறிதா னிதுவென்று காட்டி னானை

நிச்சல் நலிபிணிகள் தீர்ப்பான் தன்னைப்

பொறியா டரவார்த்த புநிதன் தன்னைப்

பொய்யிலியைப் பூந்துருத்திக் கண்டேன் நானே.

6.043.4

  மணம் கமழும் கொன்றைப் பூச் சூடி, ஐராவதம் வழிபட்ட வெண்காட்டில் உறைவானாய், அறியாத புறச்சமயத்தில் அகப்பட்ட என்னை அத்துயரக்கடலில் மூழ்காதபடி தூக்கி எடுத்து, இது தான் நேரிய வழி என்று காட்டி, நாடோறும் என்னை வருத்தும் பிணிகளைத் தீர்த்து, புள்ளிகளை உடைய ஆடும்பாம்பினை இறுகக் கட்டிய தூயோனாகிய பாசம் அற்றவனை நான் பூந்துருத்தியில் கண்டேன்.

2517 மிக்கானை வெண்ணீறு சண்ணித் தானை

விண்டார் புரமூன்றும் வேவ நோக்கி

நக்கானை நான்மறைகள் பாடி னானை

நல்லார்கள் பேணிப் பரவ நின்ற

தக்கானைத் தண்டா மரைமே லண்ணல்

தலைகொண்டு மாத்திரைக்கண் உலக மெல்லாம்

புக்கானைப் புண்ணியனைப் புநிதன் தன்னைப்

பொய்யிலியைப் பூந்துருத்திக் கண்டேன் நானே.

6.043.5

  எல்லாரினும் மேம்பட்டவனாய், வெண்ணீறு பூசி, பகைவரின் மும்மதில்களையும் அழித்து, அவற்றின் அழிவுகண்டு சிரித்து, நான்கு வேதங்களையும் ஓதித் தக்கோர்களால் விரும்பி முன்னின்று துதிக்கப்படுபவனாய், பிரமன் மண்டைஓட்டைச் சுமந்து ஒரு கணநேரத்தில் உலகமெல்லாம் சுற்றித் திரியும் புண்ணியனாய்த் தூயனாய்ப் பாசம் அற்றவனாயுள்ள எம்பெருமானைப் பூந்துருத்தியில் யான் கண்டேன்.

2518 ஆர்த்தானை வாசுகியை அரைக்கோர் கச்சா

அசைத்தானை அழகாய பொன்னார் மேனிப்

பூத்தானத் தான் முடியைப் பொருந்தா வண்ணம்

புணர்ந்தானைப் பூங்கணையா னுடலம் வேவப்

பார்த்தானைப் பரிந்தானைப் பனிநீர்க் கங்கை

படர்சடைமேற் பயின்றானைப் பதைப்ப யானை

போர்த்தானைப் புண்ணியனைப் புநிதன் தன்னைப்

பொய்யிலியைப் பூந்துருத்திக் கண்டேன் நானே.

6.043.6

  வாசுகி என்ற பாம்பினையே வில்லுக்கு நாணாகக் கட்டியும், இடையிலே கச்சாக அணிந்தும் இருப்பவனாய், பொன் போன்ற உடம்பும் தாமரையாகிய இருப்பிடமும் உடைய பிரமனுடைய தலை ஒன்றனை அவன் உடலில் பொருந்தாதபடி நீக்கியவனாய், மன்மதன் உடல் சாம்பலாகுமாறு நெற்றிக்கண்ணால் நோக்கியவனாய்ப் பின் அவனிடம் அருள் கூர்ந்தவனாய், கங்கையைச் சடை மீது தரித்தவனாய், யானை நடுங்க அதன் தோலை உரித்துப் போர்த்தவனாய்ப் புண்ணியனாய்த் தூயோனாய்ப் பாசம் அற்றவனாய் உள்ள பெருமானைப் பூந்துருத்தியில் நான் கண்டேன்.

2519 எரித்தானை எண்ணார் புரங்கள் மூன்றும் 

இமைப்பளவிற் பொடியாக எழிலார் கையால்

உரித்தானை மதகரியை யுற்றுப் பற்றி

யுமையதனைக் கண்டஞ்சி நடுங்கக் கண்டு

சிரித்தானைச் சீரார்ந்த பூதஞ் சூழத்

திருச்சடைமேல் திங்களும் பாம்பும் நீரும்

புரித்தானைப் புண்ணியனைப் புநிதன் தன்னைப்

பொய்யிலியைப் பூந்துருத்திக் கண்டேன் நானே.

6.043.7

  பகைவர் முப்புரங்களையும் இமைகொட்டும் நேரத்திற்குள் பொடியாகுமாறு எரித்து, மத யானையைப் பற்றித் தன் அழகிய கைகளால் தோலை உரித்து, உமாதேவி அது கண்டு அஞ்ச, அவள் அச்சத்தைப் பார்த்து, சிரித்துச் சடையில் பிறையும் பாம்பும் கங்கையும் சூடிப் பூதகணங்கள் சூழ இருக்கும் புண்ணியனாய்த் தூயோனாய்ப் பாசம் இல்லாதவனான பெருமானை யான் பூந்துருத்தியில் கண்டேன்.

2520 வைத்தானை வானோ ருலக மெல்லாம்

வந்திறைஞ்சி மலர்கொண்டு நின்று போற்றும்

வித்தானை வேண்டிற்றொன் றீவான் தன்னை

விண்ணவர்தம் பெருமானை வினைகள் போக

உய்த்தானை யொலிகங்கை சடைமேற் றாங்கி

யொளித்தானை யொருபாகத் துமையோ டாங்கே

பொய்த்தானைப் புண்ணியனைப் புநிதன் தன்னைப்

பொய்யிலியைப் பூந்துருத்திக் கண்டேன் நானே.

6.043.8

  வானோர் உலகமெல்லாம் படைத்தவனாய், அத்தேவர்கள் வந்து வணங்கிமலர்கொண்டு நின்று துதிக்கும் உலக காரணனாய், அடியவர்கள் விரும்பியதை அளிப்பவனாய், இந்திரனுக்கு ஏற்பட்ட சாபத்தைப் போக்கியவனாய், கங்கையைச் சடையில் மறைத்துப் பாதி உருவாய் உள்ள பார்வதிக்குப் புலப்படாதவாறு செய்தவனாய்ப் புண்ணியனாய்த் தூயோனாயுள்ள பாசமற்றவனை நான் பூந்துருத்தியில் கண்டேன்.

2521 ஆண்டானை வானோ ருலக மெல்லாம்

அந்நா ளறியாத தக்கன் வேள்வி

மீண்டானை விண்ணவர்க ளோடுங் கூடி

விரைமலர்மேல் நான்முகனும் மாலுந் தேட

நீண்டானை நெருப்புருவ மானான் தன்னை

நிலையிலார் மும்மதிலும் வேவ வில்லைப்

பூண்டானைப் புண்ணியனைப் புநிதன் தன்னைப்

பொய்யிலியைப் பூந்துருத்திக் கண்டேன் நானே.

6.043.9

  தேவருலகமெல்லாம் ஆண்டவனாய், ஒரு காலத்தில் தக்கன் வேள்வியில் தொடர்பு கொண்டு தன்னால் தண்டிக்கப்பட்ட தேவர்களோடும் திரும்பியவனாய், தாமரையில் உள்ள பிரமனும் திருமாலும் தேடுமாறு தீப்பிழம்பாக நின்றவனாய், பகைவருடைய மும்மதிலும் தீப்பற்றி அழியுமாறு வில்லைப் பூண்டவனாய்ப் புண்ணியனாய்த் தூயோனாய் உள்ள பாசம் அற்றவனைப் பூந்துருத்தியில் யான் கண்டேன்.

2522 மறுத்தானை மலைகோத்தங் கெடுத்தான் தன்னை

மணிமுடியோ டிருபதுதோள் நெரியக் காலால்

இறுத்தானை யெழுநரம்பி னிசைகேட் டானை

யெண்டிசைக்கும் கண்ணானான் சிரமே லொன்றை

அறுத்தானை யமரர்களுக் கமுதீந் தானை

யாவர்க்குந் தாங்கொணா நஞ்ச முண்டு

பொறுத்தானைப் புண்ணியனைப் புநிதன் தன்னைப்

பொய்யிலியைப் பூந்துருத்திக் கண்டேன் நானே.

6.043.10

  நந்தி பெருமான் அறிவுரையை அலட்சியம் செய்து தன் கைகளைக் கோத்துக் கயிலை மலையை எடுத்த இராவணனைப் பத்துத்தலைகளும் இருபது தோள்களும் நெரியுமாறு காலால் அழுத்தியவனாய்ப்பின் அவன் பாடிய ஏழுநரம்பின் ஓசையைக் கேட்டு அவனுக்கு அருள் செய்தவனாய், எட்டுக் கண்களை உடைய பிரமனின் மேல்தலையாகிய ஐந்தாம் தலையை அறுத்த வனாய்த் தேவர்களுக்கு அமுதம் ஈந்தவனாய், எவராலும் பொறுக்க முடியாத விடத்தை உண்டு அதனைக் கழுத்தில் இருத்தியவனாய்ப் புண்ணியனாய்த் தூயோனாய்ப் பாசம் அற்றவனாய் உள்ள பெருமானைப் பூந்துருத்தியில் நான் கண்டேன்.

திருச்சிற்றம்பலம்