2016 ராகு - கேது பெயர்ச்சி பலன்கள் - சிம்ம லக்னம்

எதிலும் முதன்மையாக தலமையேற்று நடத்தும் உங்கள் லகனத்திலேயே ராகு வந்து அமர்வதும் கேது உங்கள் லக்னத்திற்கு 7ம் இடத்தில் சஞ்சாரம் செய்வதும் ஓரளவு சிறப்பாகும். ஏற்கனவே குரு லக்னத்தில் இருக்க அவருடன் ராகு சேர்க்கை ஓரளவு நற்பலன்களை அளிக்கவல்லதாகும். இதுவரை நடைபெறாமல் தள்ளிப்போன சுபகாரியங்கள் இனிதே நடந்தேறும். அதில் சற்று தடையேற்பட்டாலும் இறுதியில் சுமூகமாக நடந்தேறும். பணவரவும் பொருள்வரவும் சுமாராக இருந்து வரும். உங்கள் லக்னத்தை சனி 10ம் பார்வையாகப் பார்ப்பதால் எதிர்பாராத தனவரவும் பொருள்வரவும் அமையும். அதே சமயம் தேவையற்ற மனவருத்தங்களும் அபவாதங்களும் வந்து சேரும்.

அடிக்கடி பிரயாணம் செய்ய நேரிடும். அதனால் நற்பலன்கள் ஏற்படும். சகோதர சகோதரிகளுக்கு சுபகாரியம் நடக்க வாய்ப்புகள் அமையும். வீட்டில் இதுகாறும் நடைபெறுமால் தள்ளிப்போன குழந்தைபாக்யம் ஒரு சிலருக்கு கிட்டும். நெருங்கிய உறவினர்களால் நன்மையேற்படும். எப்பொழுதும் சுறுசுறுப்புடன் மகிழ்ச்சியுடன் செயல்படத் தூண்டும் வகையில் வாழ்க்கையில் மாற்றங்கள் அமையும். எதிர்பார்த்த செய்திகள் சாதகமாக வந்து சேரும். பாஸ்போர்ட், விசா, உடனடியாக வந்து சேரும். தாயாரின் அன்பும் ஆதரவும் கிட்டும்.

காதல் விஷயங்களில் ஈடுபட்டு மனதை அலைக்கழித்தல் கூடாது. காதல் நிறைவேறுவதில் நிறையத் தடைகள் ஏற்பட்டு விலகும். வீடு, வண்டி, வாகனங்கள் வாங்க வாய்ப்பு அமையும். கொடுத்த பணத்தைத் திருப்பிக் கேட்பதால் தேவையற்ற மனவருத்தங்களும் வேதனைகளும் மிஞ்சும். கடன் கிடைப்பதில் சற்று சுணக்கமான சூழ்நிலை அமையும். தேவையில்லாமல் கடன் வாங்குதல் கூடாது. வீட்டு வளர்ப்புப் பிராணிகளில் குறிப்பாக நாயால் மனவருத்தங்கள் ஏற்படும்.

குழந்தைகளின் அன்பும் ஆதரவும் கிட்டும். அதே சமயம் குழந்தைகளால் மனவருத்தங்களும் ஏற்படும். குடும்பத்தில் புதிய வரவுகள் வந்து சேரும். வழக்குகள் இழுபறியாகவே இருந்து வரும். நண்பர்களால் சகாயமும் ஆதாயமும் கிட்டும். கணவன் மனைவி உறவு சற்று சுமாராகாவே இருக்கும். எதிலும் நிலையற்ற தன்மையும் மகிழ்ச்சியற்ற சூழ்நிலையும் அமையும். விருந்து கேளிக்கைகளில் மனம் ஈடுபடும். உங்கள் லக்னத்திற்கு 7ல் கேது பகவான் சஞ்சாரம் செய்வதால் கணவன் மனைவி இருவரும் தேவையற்ற விஷயங்களைப் பற்றிப் பேசுதல் கூடாது. அதனால் மனவருத்தங்களும் வேதனைகளும் மிகும். அடிக்கடி ஆலய தரிசனம் செய்ய வாய்ப்புகள் வந்து சேரும். ஒரு சிலருக்கு எதிர்பார்த்த விவகாரத்துக்கள் கிடைப்பதில் சற்று காலதாமதம் ஏற்படும்.

உத்யோகம், வேலை (JOB)

வேலை என்பது இங்கு அரசு மற்றும் பெயர்போன தனியார் கம்பெனிகளில் சம்பளம் பெறுவதைக் குறிக்கும். அதாவது அரசு அல்லது தனியார் நிறுவனத்தில் மாதச் சம்பளம் பெறுவதைக் குறிக்கும். சிம்ம லக்னத்திற்கு 6ம் இடத்து சனி 4ம் இடத்தில் சஞ்சாரம் செய்வதால் வேலையில் திருப்தியற்ற தன்மை இருந்து கொண்டேயிருக்கும். உயரதிகாரிகள் விஷயத்தில் கவனமுடன் நடந்து கொள்ளல் வேண்டும். அவசரப்பட்டு வேறு கம்பெனிக்கு “பேப்பர்” போடாமல் சற்று நிதானமாகவே வேலையில் கவனம் செலுத்துதல் வேண்டும். எந்தக் கம்பெனியில் வேலை பார்த்தாலும் வேலையில் சற்று திருப்தியற்ற சூழ்நிலையே நிலவும். ஒரு சிலருக்கு உத்யோக உயர்வும் அதே சமயத்தில் ஊதிய உயர்வும் ஒரு சேர வந்து சேரும். “ஆன்சைட்” செல்ல ஒரு சிலருக்கு சந்தர்ப்பம் வாய்க்கும். அதனால் நற்பலன்களே நடந்தேறும் சக ஊழியர்களால் நன்மையும் ஆதரவும் கிட்டும்.

தொழில் (BUSINESS) வியாபாரம் (TRADE)

சிம்ம லக்னத்திற்கு 7ம் இடத்தில் கேது சஞ்சாரம் செய்வதால் சுயதொழில் சற்று கவனம் தேவை. 7ம் இடம் என்பது சொந்தமாகவோ அல்லது பார்ட்னரோடு சேர்ந்து பண்ணும் தொழிலைக் குறிக்கும். எனவே தொழில் கூட்டாளிகளோடு தேவையில்லாமல் மனவருத்தங்கள் வந்து சேரும். புதிய தொழில்கள் தொடங்குவதில் சற்று நிதானம் தேவை. தேவையில்லமல் முதலீடு செய்தல் கூடாது. பங்குச்சந்தையில் எதிர்பார்த்த லாபம் கிடைப்பதில் சற்று சிரமம் ஏற்படும். எனவே ஷேர் மார்க்கெட்டில் முதலீடு செய்வதில் அதிகக் கவனம் தேவை. பால், பழம், காய்கறிகள், ஆடை, ஆபரணம், பிளாஸ்டிக், உணவு, வெள்ளி வியாபாரங்கள் சாதகமாக அமையும். போக்குவரத்து தகவல் தொடர்பு கமிஷன் ஏஜென்ஸி, கன்சல்டன்ஸி, ஐ.டி துறைகள் சாதகமாகவும், புரோக்கரேஜ் சற்று சுமாராகவும் ரியல் எஸ்டேட் உயர்ந்தும் காணப்படும். மருத்துவம், பொறியியல், விஞ்ஞானம், நிதி, நீதி, வங்கி, இன்சூரன்ஸ், கல்வித் துறைகள் லாபகரமாகவும், சிறுதொழில் சுயதொழில் புரிபவர்களுக்கு சற்று சுமாராகவும் இருக்கும். ஏற்றுமதி இறக்குமதியில் கவனம் தேவை.

விவசாயம் :

விவசாயம் சற்று சுமாராக இருக்கும். விளைச்சல் பரவாயில்லாமல் அமையும். விளைச்சலுக்கேற்ற விலை கிடைக்காது. பணப்புழக்கம் நன்கு அமையும். ஒரு சிலருக்கு புதிய விளை நிலைங்கள் வாங்க சந்தர்ப்பங்களும் சூழ்நிலைகளும் அமையும். நீண்ட தூரப் பயணம் செய்ய வாய்ப்புகள் அமையும்.

அரசியல் :

அரசியல் வாழ்வு ஏற்ற இறக்கமுடன் இருந்து வரும். மக்கள் சக்தி ஆதரவு இருப்பது போல் தோன்றினாலும் தேர்தலில் போட்டியிட்டால் தோலிவியே மிஞ்சும். எதிரிகளால் மறைமுகத் தொல்லைகள் இருந்து கொண்டேயிருக்கும். யாரையும் எளிதில் நம்பி காரியத்தில் இறங்குதல் கூடாது. தொண்டர்களின் ஆதரவும் அன்பும் வலுவாக இருந்து கொண்டேயிருக்கும்.

கலைஞர்கள் :-

கலைத்துறை ஏற்றம் மிகுந்து காணப்படும். ஒரு சில கலைஞர்களுக்கு பட்டங்களும் விருதுகளும் வந்து சேரும். எப்பொழுதும் சுறுசுறுப்பாகவும் மகிழ்ச்சிகரமாகவும் இருக்க வாய்ப்பு அமையும். புதிய ஒப்பந்தங்கள் அடிக்கடி ஏற்படும். பொருளாதார சூழ்நிலைகள் சாதகமாக இருக்கும். நிதி நிலைகள் ஒரே சீராக இருக்கும். இசை, நாடகம், சினிமா, ஓவியம், சிற்பம், சின்னத்திரை ஏற்றம் பெறும். அடிக்கடி வெளியூர் வெளிநாடு செல்ல வாய்ப்புகள் அமையும். கடன்கள் வழக்குகள் கவலை அளிப்பதாக ஒரு சிலருக்கு அமையும். உடல் ஆரோக்யத்திலும் அதிகக் கவனம் செலுத்துதல் வேண்டும்.

மாணவர்கள் :

புதிய விஷயங்களை அறிவதும் அவற்றை கற்பதிலும் ஆர்வம் அதிகரிக்கும். விருந்து கேளிக்கைகளை குறைத்துக் கொள்ளுதல் நலம். எதிர்பார்த்த பள்ளி கல்லூரி அமையும். எதிர்பார்த்த மதிப்பெண்கள் வந்து சேரும். விளையாட்டு, டி.வி. சினிமா இவற்றைக் குறைத்தல் நலம். உயர்கல்வி பயில ஒரு சிலர் வெளிநாடு செல்லவும் யோகம் ஏற்படும். சீரான நடைப் பயிற்சியும் உடல்பயிற்சியையும் மேற்கொள்ளுதல் வேண்டும். தேவையற்ற விஷயங்களில் மனதை செலுத்துதல் கூடாது.

பெண்கள் :

வீட்டில் சுபகாரியங்கள் நடக்க வாய்ப்புகள் அமையும் இதுவரை நடக்காமல் தள்ளிப்போன திருமணம், குழந்தை பாக்யம் போன்ற மகிழ்ச்சிகரமான விஷயங்கள் இனிதே நடந்தேறும். ஒரு சிலருக்கு விவகாரத்தும் இரண்டாவது திருமணமும் நடைபெறும். அடிக்கடி பிரயாணம் செய்ய வாய்ப்புகள் அமையும். தெய்வ தரிசனம் ஆலய தரிசனம் கிட்டும். மனம் ஆன்மீகத்தில் அதிக ஈடுபாடு கொள்ளும். குழந்தைகளால் தேவையற்ற பிரச்சனைகளும் மனவருத்தங்களும் வந்து சேரும். வேலை பார்க்கும் பெண்களுக்கு வேலையில் முன்னேற்றம் அமையும். ஒரு சிலருக்கு ஊதிய உயர்வு கிட்டும். உயரதிகாரிகளால் தேவையற்ற மனவேதனைகளும் பிரச்சனைகளும் சக ஊழியர்களின் அன்பும் நட்பும் கிட்டும். பொதுவாக தேவையில்லாத விஷயங்களில் பேச்சைக் குறைத்தல் உத்தமம். உடலில் சளித் தொல்லைகள் இல்லாமல் பார்த்துக் கொள்ளல் அவசியம் அலைச்சைல்கள் அதிகரிக்கும்.

உடல் ஆரோக்யம் :

உடலில் அடிவயிறு, கால் போன்ற பகுதிகளில் பாதிப்பு ஏற்படாமல் பார்த்துக் கொள்ளல் வேண்டும். தலை, பல் போன்ற உடல் உறுப்புகளில் அதிகக் கவனம் தேவை. உடலில் நோய் எதிர்ப்பு சக்தி குறைந்து காணப்படும். சத்தான காய்கறிகள் பழங்கள், கீரைகள் உட்கொள்ளுதல் வேண்டும்.

அதிர்ஷ்ட எண் : 6, 8

அதிர்ஷ்ட நிறம் : வெண்மை, கருப்பு

அதிர்ஷ்ட நாள் : வெள்ளி, சனி

அதிர்ஷ்ட இரத்னம் : வைரம், கருநீலக்கல்

 பரிகாரம் :

“வியாழக்கிழமை” தோறும் படைப்புக் கடவுளான “ஸ்ரீ பிரம்ம தேவரை” வழிபடுதல் நன்மை பயக்கும். “குலதெய்வ” வழிபாடும் “அம்பாள்” வழிபாடும் சிறப்பானதாகும்.

- ஜோதிட இமயம் அபிராமி சேகர்

maduraiabiramisekar@gmail.com

9994811158