இதுவரை நடத்தப்பட்ட மாநாடுகள்

International Association of Tamil Research (IATR) என்பதன் தமிழ் - உலகத் தமிழாராய்ச்சி மன்றம். இவ்வமைப்பானது ஈழத்தைச் சேர்ந்த தனிநாயக அடிகளாரினால் 1952-1966 இடைப்பட்ட காலத்தில் ஆங்கில மொழியில் நடாத்தப்பட்ட Tamil Culture ஆய்விதழின் தொடர்ச்சி ஆகும். Tamil Culture ஆய்விதழின் அடிநாதமென்பது தமிழ்மொழிக்குரிய சிறப்பான விடயங்களை ஆங்கிலத்தில் உலகிற்குக் கொண்டுசெல்லுதலாகும். 1950களில் ஆங்கிலமொழியில் எழுதப்பட்ட இந்திய வரலாறுகளில் தமிழ் மொழி, இனம் தொடர்பான விடயங்கள் உள்ளடக்கப்பட்டிருக்காத ஒரு இருட்டடிப்பு நிகழ்ந்துகொண்டிருந்தவேளையில் தமிழ் தொடர்பான உண்மைகளை உலகிற்கு உரத்துச் சொல்லவேண்டிய தேவையின்பொருட்டு Tamil Culture ஆங்கிலத்தில் ஆராய்ச்சிபூர்வமான கட்டுரைகளைத் தாங்கி வெளிவந்தது. இவ்விதழில் தங்கள் ஆராய்ச்சிக் கட்டுரைகளை வெளியிட்டு வந்த உலகளாவிய ஆராய்ச்சியாளர்களையும் தமிழைப் பல்கலைக்கழங்களில் கற்பித்துக்கொண்டிருந்த ஆசிரியர்களையும் ஒரே குடையின்கீழ் ஒருங்கிணைத்து நேரடியான கருத்துப் பரிமாற்றம் நிகழ்வதற்குரிய களமாக உலகத் தமிழாராய்ச்சி மன்றம் செயலாற்றத் தொடங்கியது. 1966 ஆண்டில் முதலாவது உலகத் தமிழாராய்ச்சி மாநாடு மலேசியாவில் நடைபெற்றபோது ''தமிழ்த்துறைகளின் உலக ஆராய்ச்சிக் கருத்தரங்கு'' எனுந் தலைப்பில் அறிவிப்பு வெளியிடப்பட்டது, இது IATR இன் உத்தியோகபூர்வ வெளியீடு.

 

மாநாட்டில் வாசிக்கப்பட்ட ஆய்வுக் கட்டுரைகள் ''Proceedings of the First International Conference Seminar of Tamil Studies'' என்ற தலைப்பில் இரு தொகுதிகளாக வெளியிடப்பட்டன. 1966 மாநாட்டின்போது IATR அமைப்பானது வெளியிட்டவை அனைத்துமே ஆங்கிலத்திற்றான். 6 ஆராய்ச்சிக் கட்டுரைகள் தமிழில் வாசிக்கப்பட்டன, எனினும் தமிழில் ஆய்வுத் தொகுதி எதுவும் தனியாக வெளியிடப்படவில்லை. தனிநாயக அடிகளாரின் சிந்தனையே தமிழ் ஆராய்ச்சியினை(Tamil Studies) மையமாகக்கொண்டதுதான். முதலாவது மாநாட்டின்போது ஆராய்ச்சிப் பெறுமதிமிக்க ஒன்பது நூல்களும் வெளியிடப்பட்டிருந்தன. ஆனால் மாநாட்டு நினைவு மலர் என்று எதுவும் தமிழில் வெளியிடப்பட்டதான தகவல்கள் எதையும் நான் இன்னமும் பார்வையிடவில்லை.

 

1968 ஆண்டில் சென்னையில் நடைபெற்ற இரண்டாவது உலகத் தமிழாராய்ச்சி மாநாட்டின்போதுதான் ''உலகத் தமிழ் மாநாடு - விழா மலர்'' வெளியிடப்படும் வழக்கம் தொடங்கப்பட்டது. ஆனால் இவ்விழா மலரினை IATR அமைப்பு வெளியிடுவதில்லை. மாறாக மாநாட்டினை நடாத்துவதற்கு பொருளுதவியும் அரவணைப்பும் தந்த அரசின் வெளியீடாகவே இது காணப்படுகிறது. இதற்கு ஆய்வுப் பெறுமதி இருப்பதில்லை. அரச பிரதானிகளினதும் ஆதரவாளர்களினதும் ஆக்கங்கள் பெரும்பாலும் இடம்பெறும், ஒருசில ஆய்வுக் கட்டுரைகளும்கூட இடம்பெற்றுள்ளன. இவ்விழா மலரானது பல நிறத்தில் சித்திரப் படங்களுடன் கூடியவாறு, வழுவழுப்பான தாளில் உயரிய தயாரிப்பான ஒன்றாகும். பெரும் எண்ணிக்கையில் அச்சிடப்பட்டு மாநாட்டிற்கு வருகிறவர்கள் அனைவருக்கும் கிடைக்கூடியவாறு இம்மலர் வழங்கப்படும். மாநாட்டினை நடத்தும் கட்சியின் புகழ்பரப்பும் ஒரு வெளியீடு. அதில் ஆராய்ச்சி இல்லையென்பதாலேயே அதன் தலைப்பிற்கூட ''ஆராய்ச்சி'' இடம்பெறுவதில்லை.

 

இவ்வாறான மலர்களையே கட்டுரையாளர் தே மொ ழி தந்துள்ளார். IATR அமைப்பு வெளியிடாத இம்மலர்களை IATR இற்கு உரித்துடையதாகக் காட்டுதல் ''வரலாற்றில் பொய்கள்'' பக்கங்களில் இடம்பெறவேண்டிய ஒன்றாகும்.