தினப்பலன்களை படிப்பதற்கு முன் கவனத்தில் கொள்ளவேண்டியவை !

வான மண்டலத்தில் ஒரு ராசி என்பது மூன்று நட்சத்திரங்களின் ஒன்பது பாதங்களை அல்லது முப்பது டிகிரியைக் கொண்ட பகுதி. இந்த உலகில் பிறப்பவர்கள் மேஷம் முதல் மீனம் வரையுள்ள  பன்னிரண்டு ராசிகளில் தான் பிறக்கிறார்கள். ஒரு ராசியில் இந்த உலகில் பல கோடி மனிதர்கள் இருப்பார்கள். அவர்கள் எல்லோருக்கும் ஒரே மாதிரியான பலன்கள் நடப்பதில்லை. ஒருவரது ஜாதகப்படி பலன்கள் இருவகைப்படும். ஒன்று அவருடைய தசா புக்தியையும் லக்னத்தையும் அடிப்படியாகக் கொண்டு சொல்லப்படுவது. இது தனிப்பட்ட ஒருவரது ஜாதகத்தை மட்டுமே வைத்து சொல்லமுடியும்.  மற்றொன்று கோச்சாரம் என்று சொல்லப்படும் "கோள் (கிரக) சார நிலை". ஒரு ராசியிலிருந்து ஒன்பது கிரகங்களும் எந்த வீட்டில் ( ராசியில்) இருக்கின்றனவோ அதை வைத்துச் சொல்லபடுவதாகும். இது அவரவருடைய தசா புக்தியைப் பொறுத்து சற்று மாறுபடலாம். இதை மனதில் வைத்து ராசி பலன்களைப் படியுங்கள்.