திருவையாற்றில் தியாகராஜ சுவாமிகளின் 177-வது ஆராதனை விழா - பஞ்சரத்தினக் கீர்த்தனைகளைப் பாடி கலைஞர்கள் இசையஞ்சலி.

தஞ்சாவூர் மாவட்டம் திருவையாறில் நேற்று நடைபெற்ற தியாகராஜ சுவாமிகளின் 177-வது ஆண்டு ஆராதனை விழாவில், ஏராளமான இசைக் கலைஞர்கள் பஞ்சரத்ன கீர்த்தனைகளைப்பாடி இசையஞ்சலி செலுத்தினர்.

சங்கீத மும்மூர்த்திகளில் ஒருவரான தியாகராஜ சுவாமிகள், தஞ்சாவூர் மாவட்டம் திருவையாறு காவிரிக் கரையில் முக்தி அடைந்தார். இங்கு அவரது சமாதி அமைந்துள்ளது. ஆண்டுதோறும் பகுலபஞ்சமி தினத்தில் தியாகராஜ சுவாமிக்கு ஆராதனை விழா நடைபெறுவது வழக்கம். நடப்பாண்டு 177-வது ஆராதனை விழா கடந்த 26-ம் தேதி தொடங்கியது.

தொடர்ந்து தினமும் காலை 8 மணி முதல் இரவு 11 மணி வரை பல்வேறு இசை நிகழ்ச்சிகள் நடைபெற்றன. இதில் பல்வேறு இசைக் கலைஞர்கள் பாடியும், இசைக் கருவிகளை வாசித்தும் தியாகராஜ சுவாமிகளுக்கு இசையஞ்சலி செலுத்தி வந்தனர். விழாவின் நிறைவு நாளான 30/01/2024 காலை தியாகராஜ சுவாமி வாழ்ந்த இல்லத்திலிருந்து உஞ்ச விருத்தி பஜனை புறப்பட்டது. பின்னர் மேளதாளங்கள் முழங்க, திருமஞ்சன வீதி, தெற்கு வீதி வழி யாக சன்னிதியைச் சென்றடைந்தது.

ஆஞ்சநேயர் உற்சவத்துடன் விழா நிறைவு 

காலை 9 மணியளவில் பிரபஞ்சம் பாலசந்திரனின் புல்லாங்குழல் இசையுடன் பஞ்சரத்ன கீர்த்தனை தொடங்கியது. பிரபல இசைக் கலைஞர்கள் சுதா ரகுநாதன், மஹதி, நித்யஸ்ரீ மகாதேவன், ஓ.எஸ்.அருண், கடலூர் ஜனனி, அரித்துவாரமங்கலம் ஏ.கே.பழனி வேல், ஸ்ரீமுஷ்ணம் ராஜாராவ், திருவனந்தபுரம் பின்னி கிருஷ்ண குமார் உள்ளிட்ட ஏராளமான இசைக் கலைஞர்கள் ஒருமித்த குரலில் பாடியும், இசைக் கருவிகளை வாசித்தும் தியாகராஜருக்கு இசையஞ்சலி செலுத்தினர்.

அப்போது, தியாகராஜ சுவாமிகளுக்கு பல்வேறு வாசனைத் திரவியங்களால் அபிஷேகம் செய்யப் பட்டு, தீபாராதனை நடைபெற்றது. இந்த நிகழ்ச்சியில், மாவட்ட ஆட்சியர் தீபக் ஜேக்கப், கூடுதல் ஆட்சியர் ஸ்ரீ காந்த் மற்றும் தியாகப் பிரம்ம மகோத்சவ சபா அறங்காவலர்கள், நிர்வாகிகள் கலந்து கொண்டனர். பஞ்சரத்ன கீர்த்தனையைத் தொடர்ந்து, பல்வேறு இசைக் கலைஞர்கள் ஹரிகதை, பாட்டு, புல்லாங்குழல், நாகசுரம் நிகழ்ச்சி களை நடத்தினர். இரவு 10.40 மணிக்கு ஆஞ்சநேயர் உற்சவத்துடன் விழா நிறைவுபெற்றது.