இயற்கையான முறையில், ஒரே செடியில் தக்காளியும், உருளைக் கிழங்கும், விளைவித்து இங்கிலாந்து நிறுவனம் சாதனை !!

விவசாயத்தில் ஒரு புதிய புரட்சியாக, இயற்கையான முறையில், ஒரே செடியில் தக்காளியும், உருளைக் கிழங்கும், விளைவிக்கும் ஒரு புதிய முறையை இங்கிலாந்தை சேர்ந்த தாம்சன் அண்டு மார்கன் என்ற நிறுவனம் கண்டுபிடித்துள்ளது. இது குறித்து அந்நிறுவன உயரதிகாரிகளுள் ஒருவரான, பவுல் ஹான்சர்டு கூறியதாவது:  இரு வெவ்வேறு காய்கறிகளை, ஒரே செடியில் விளைவிப்பது என்பது மிகவும் கடினமான காரியம். இது போன்ற செயல்களை விஞ்ஞானிகள் மரபியல் மாற்றங்களை செய்துதான் வெற்றி கண்டுள்ளனர். எனினும், அவ்வகையான மாற்றங்கள் செய்யாமல், முற்றிலும் இயற்கையான முறையில், இரு செடிகளை இணைத்து அவற்றில் விளையும் காய்கறிகளை, ஒரே செடியில் முதல் முறையாக விளைவித்துள்ளோம். இரு தாவரங்களின் திசுக்களையும் பிரித்து, ஒரு குறிப்பிட்ட நிலைக்குப் பின், இரண்டும் ஒன்றாக ஒரே தொட்டியில் வளர்க்கப்பட்டன. இதன் பின், சரியான நேரத்தில், தக்காளிகள் காய்க்கத் துவங்கின, வேர்ப் பகுதியில், உருளைக்கிழங்கும் முளைத்திருந்தது. இயற்கை முறையில் முதன் முதலாக ஒரே தாவரத்தில் இரு வேறு காய்கறிகள் உருவாக்கப்பட்டுள்ளன. இது மகிழ்ச்சியை அளிக்கிறது. சோதனை முறையில் மட்டுமின்றி, வியாபார ரீதியாகவும் இந்த முறை வெற்றி பெற்றுள்ளதாக தெரவித்த அந்நிறுவனம். இதில் விளையும் காய்கறிகள் மிகுந்த சுவையுடன் இருப்பதால், மக்கள் விரும்பி வாங்கிச் செல்வதாகவும் தெரிவித்துள்ளது. ஒரே செடியில் இருவேறு காய்கறிகளை வளர்க்கும் இந்த புதிய முறையை நியூசிலாந்து நாட்டு விவசாயிகள் பின்பற்ற துவங்கியுள்ளனர் என்பது குறிப்பிடத்தக்கது.