முதலாவது உலகத் தமிழிசை மாநாடு -2019 தீர்மானங்கள்

முதலாவது உலகத் தமிழிசை மாநாடு -2019 தீர்மானங்கள்

1. தமிழிசை மாநாடுகளைத் தொடர்ந்து நடத்துவதற்கு ஏதுவாக உலகத் தமிழிசை ஆராய்ச்சிக் கழகம் என்ற அமைப்பை ஏற்படுத்துவது என்று இந்த மாநாடு தீர்மானிக்கிறது.
2. தமிழகத்தின் அனைத்துப் பள்ளிகளிலும் (தொடக்க நிலை முதல் மேல் நிலை வரை) தமிழிசையை ஒரு பாடமாக முறையாகச் சேர்த்து உரிய ஆசிரியர்களை நியமிக்க வேண்டும்.
3. தமிழிசை படித்தவர்களுக்குத் தொடக்கப்பள்ளிகளில் வேலைவாய்ப்பு ஏற்படுத்தவேண்டும்.
4. இசை நூல்களைத் தொகுத்து உலகத் தமிழாராய்ச்சி நிறுவனத்தில் தமிழிசை ஆய்வு நூலகம் உருவாக்கப்பட வேண்டும். மேலும் தமிழ்நாடு அரசின் சார்பில் தமிழிசை நூல்களைத் தொகுத்து ஆங்கிலத்தில் உள்ளவற்றைத் தமிழிலும், தமிழில் உள்ளவற்றை ஆங்கிலத்திலும் மொழிமாற்றம் செய்து உலகளாவிய தமிழிசை ஆய்வுக்கு வழிகோல வேண்டும்.
5. உலகத் தமிழிசை மாநாடு இரண்டாண்டுகளுக்கு ஒரு முறை உள்நாடு மற்றும் வெளிநாடுகளில் நடத்தவேண்டும். முதல் உலகத் தமிழிசை மாநாட்டில் உருவாக்கப்படும் உலகத் தமிழிசை ஆராய்ச்சிக் கழகம் வழிகாட்டு நெறிமுறைகளை வகுக்கும். இதற்குத் தமிழ்நாடு அரசு ஆக்கத்தையும், ஊக்கத்தையும் வழங்கிட கேட்டுக்கொள்கிறோம்.
6. இசைத் துறையில் சிறந்து விளங்கி துறை வளர்ச்சிக்குப் பங்களிப்பு செய்தவர்களுக்கு, ஆப்ரகாம் பண்டிதர், வி.பா.க சுந்தரம், விபுலானந்த அடிகள் ஆகியோரின் பெயரில் தமிழ் நாடு அரசின் சார்பில் விருதுகள் வழங்கிச் சிறப்பிக்க வேண்டும்.
7. இசைக் கருவிகள் உருவாக்குபவர்களின் நலனைப் பாதுகாக்க நலவாரியம் தமிழ் நாட்டு அரசு கலைப் பண்பாட்டுத்துறை சார்பில் அமைத்து இசைக்கருவிகள் அழிந்து விடாமல் காப்பாற்றப்பட வேண்டும், பயிற்சிகள் வழங்க வேண்டும்.
8. பழங்குடியின மக்களின் இசைக் கருவிகளை வாசிக்க வைத்து அதைத் தமிழக அரசு ஆவணப்படுத்த வேண்டும். அந்த இசையைப் பாதுகாப்பதற்கான முயற்சிகளை உலகத் தமிழ்ச் சங்கத்தின் வழியாக மேற்கொள்ள வேண்டும்.
9. கலைப் பண்பாட்டுத் துறையின் சார்பில், மாவட்டந்தோறும் மார்கழித் திங்களில் தமிழிசை விழாக் கோலாகலமாக நடத்தப்படவேண்டும்.