சாகித்ய அகாதமி விருது பெற்ற மு.ராஜேந்திரன், IAS

மு.ராஜேந்திரன் ஆங்கில இலக்கியம் பயின்றவர். தமிழக வரலாற்று ஆய்வில் பற்றுக் கொண்டவர். மதுரையில் 3 ஆண்டுகள் வழக்கறிஞராகப் பணியாற்றிய பின் திருவண்ணாமலை ஆட்சியர், தமிழக வேளாண்மைத்துறை ஆணையர், பிற்படுத் தப்பட்டோர் நலத்துறை ஆணையர் என இந்திய ஆட்சிப்பணிகளில் பல்வேறு பொறுப்புகளை வகித்தவர். வேளாண் ஆணையராக இருந்தபோது மூன்று ஆண்டுகள் பாரதப்பிரதமரிடம் விருது வென்றவர். மக்கள்தொகை கணக்கெடுப்பில் செய்த பணிகளுக்காக ஜனாதிபதியிடம் வெள்ளிப்பதக்கம் பெற்றவர். தமிழ் எழுத்தின் மீதும் காதல் கொண்டு படைப்பாளராகவும் மிளிர்கிறார். வடகரை 1801, காலாபாணி, மதாம் ஆகிய மூன்றும் இவரது புதினங்கள். பதானி இவரது சிறுகதைத் தொகுப்பு. வெயில் தேசத்தில் வெள்ளையர்கள் உள்பட 3 கட்டுரை நூல்களும் தந்துள்ளார். செயலே சிறந்த சொல் என்ற தன் வரலாறும் தந்துள்ளார். ஆனந்தரங்கம் பிள்ளையின் சேதிக் குறிப்புகளை கவிஞர் அ.வெண்ணிலாவுடன் இணைந்து 12 தொகுதிகளாக பதிப்பித்தவர். இலக்கிய விருதுகள் பலவும் பெற்றுள்ள டாக்டர் மு.ராஜேந்திரனின் காலாபாணி புதினத்துக்கு கிடைத்துள்ள சாகித்ய அகாதமி விருது, மு.ராவின் தமிழ் உழைப்புக்கு கிடைத்த மணிமகுடம் என்று சொல்லலாம்.