வலைத்தமிழ் சேவைகள் எப்படி திட்டமிடப்படுகிறது?

"இருப்பதை பரப்புவதும், இல்லாததை உருவாக்குவதும் " என்ற இலக்கோடு வலைத்தமிழ் குழு பல்வேறு தமிழ் , சமூகப்பணிகளை செய்துவருகிறது.

பெரும்பாலும் எங்களை முன்னிறுத்திக்கொள்ளாமல், திட்டத்தின் பெயரை, அமைப்பின் பெயரை, இயக்கத்தின் பெயரை, செயல்பாட்டின் தேவையை, நோக்கத்தை , இயக்கத்தை பொறுப்பேற்று நடத்தும் தலைவரின் பெயரை, அவருடைய பின்புலத்தை வெளிச்சமிட்டு செயலில் , விளைவில் கவனம் செலுத்துவதை கொள்கையாகக் கொண்டு பயணிக்கிறோம்.

இந்த வகையில் வலைத்தமிழ் ஒரு திட்டத்தை கையில் எடுக்கும்போது கீழ்காணும் கேள்விகளை கேட்டு, இதில் அனைத்திற்கும் ஆம் என்று வந்தால் மட்டுமே அதில் ஈடுபடுகிறோம்.

1. இதுவரை எவரும் கையில் எடுக்காத தீர்வு காணாத பணியா? அல்லது ஏற்கனவே முயற்சித்து இடையில் நிறுத்தப்பட்ட ஒன்றா? அல்லது  கையில் எடுத்து  மேலோட்டமாக  செய்துமுடித்து விட்டுச்சென்ற பணியா?
2. தற்காலிகத் தேவையாக இல்லாமல் நீண்டகாலம் நிலைத்து சமூகத்திற்கு பயனளிக்கும் தேவையா?
3. சமூகத்திற்கு இது அவசியமான, இக்காலத்தில் தேவையான ஒன்றா?
4. நம்மால் முழுமையாக முடித்து ஒரு நிறைவை குறுகிய சில ஆண்டுகளில் (அதிகப்படியாக ஐந்து ஆண்டு) செய்துவிடக்கூடிய வாய்ப்பு உள்ள திட்டமா?
5. வேறு எவரும் இதே பணியை தொடர்ந்து செய்யவில்லை என்பதை உறுதிசெய்யப்பட்டதா?
6. நூல், எழுத்து , சிந்தனை அளவில் நின்றுவிடாமல் விளைவுகளை கண்ணால் காண களத்தில் மக்களிடம் கொண்டுசேர்க்கும் செயல்பாடு இணைந்துள்ள முழுமையான  திட்டமா?
7. திட்டத்தின் வெற்றியை அளவிட முடியுமா? அளவிட முடியாது, ஒரு கட்டுக்குள் வராது என்பதைக் கையில் எடுக்கவேண்டாம்.

இது அனைத்து கேள்விகளும் ஆம் என்று வந்தால் மட்டுமே நாம் அதை கையில் எடுத்து , அதற்கான நேரம், உழைப்பு, தன்னார்வப்பணி, நம்மால் முடிந்த பொருளாதாரம் என்று முதலீடு செய்து குறிப்பிட்ட காலத்திற்குள் முடிக்கிறோம்.  இது பல விளைவுகளை ஏற்படுத்துகிறது.